گازەتىمىزدىڭ حابارى (ٴتىلشىمىز گۇلناز حابارلايدى). 1 - ايدىڭ 10 - كۇنىٴتىلشىنىڭ ايماقتىق جۇمىسشى ۇيىمىنان ۇعىسۋىنا قاراعاندا، 27 - كەزەكتى حاربين حالىقارالىق قار ويما باسەكەسىندە التاي ايماقتىق جۇمىسشى ۇيىمى تاڭداپ جىبەرگەن قار - مۇز ويما ۇيىرمەسى جۇڭگو 3 - كومانداسىنا ۋاكىلدىك ەتىپ، «جىۋاڭ شۋتۇڭ» اتتى تۋىندىسى 2 - دارەجەلى سيلىقتى ەنشىلەگەن.
ۇعىسۋعا قاراعاندا، 1 - ايدىڭ 9 - كۇنى حاربين قالالىق حالىق ۇكىمەتى ۇيىمداستىرعان، حاربين قالالىق حالىق ۇكىمەتىنىڭ سىرتقى ىستەر كەڭسەسى، حاربين قار - مۇز داشىجيە جارنا شەكتى سەرىكتەستىگى، حاربين قالاسى تايياڭداۋ كورىنىس رايونىنىڭ مال ـ مۇلىك تيجارات شەكتى سەرىكتەستىگى ۇستىنە العان، حاربين قالالىق حالىقتىق شەتەلدەرمەن دوستىق قىزمەت وتەۋ ورتالىعى سەلبەسىپ وتكىزگەن 27 - كەزەكتى حاربين حالىقارالىق قار ويما باسەكەسى حاربين قالالىق تايياڭداۋ قار ويما كورمەسىندە اياقتالدى.
وسى كەزەكتى باسەكەگە 10مەملەكەتتەن 25 تاڭداۋلى ۋاكىلدەر كومانداسى قاتىناستى. دۇنيەنىڭ جەر - جەرىنەن كەلگەن 100 دەن استام قار ويما كوركەمونەرشىسى فيلوسوفيالىق ۇستانىم، ۇلتتىق مادەنيەت، گۋمانيتارلىق سالت - سانا، وڭىرلىك كەلبەت قاتارلى جاقتاردى شىعار ٴتۇيىن ەتتى. 4 كۇنگە جالعاسقان كوركەمونەر جاسامپازدىق بارىسىندا ويىلعان قار ويما تۋىندىلارى دۇنيە ٴجۇزىنىڭ كوپ نەگىزدى مادەنيەتىنىڭ سيىسىمدىلىعى مەن ٴتۇيلىسۋىن تولىق ايگىلەدى.
بۇل جولعى سيلانعان تۋىندى «جىۋاڭ شۋتۇڭنىڭ» شىعارماشىلىق شابىتى AI داۋىرىندەگى ادامزات تاعدىرى تىعىز بايلانىستى بولعان قوعامدىق قۇبىلىستان كەلگەن. شىعارماداعى كەيىپكەردىڭ كيىم - كەشەگى، اشەكەيلەۋ ورنەك ستيلى مۇلدە باسقاشا بولىپ، ٴاربىر ورنەكتە ۇلتتاردىڭ تاريحى مەن مادەنيەتى بەينەلەنىپ، تۋىندىنىڭ باي مازمۇنىن، كوپ نەگىزدى بەينەسىن قالىپتاستىردى.
التاي قار - مۇز قار ويما ۇيىرمەسىن ايماقتىق جۇمىسشى ۇيىمى قۇرىپ، مۇشە تاڭداۋدا ونەرى، جاس شاماسى قاتارلى فاكتورلارعا باسا ٴمان بەرىلدى. ۇيىرمە كاسىپتىك اسەمونەر مەكتەپتەرىنەن وقۋ تاۋىسقان وقۋشىلار مەن تاجىريبەسى مول حالىقتىق قولونەر شەبەرلەرىنەن قۇرالىپ، وسى رەت ۇيىرمە مۇشەلەرىنەن يۋان ۋىنيۇي، قانات عالىمبەك ۇلى، ٴادىلجان قۇربان قاتارلىلار سيلىق الدى. التاي قار - مۇز ويما ۇيىرمەسىنىڭ جەتەكشىسى يۋان ۋىنيۇي بىلاي دەدى: التايدىڭ وزگەشە مادەنيەت فاكتورىن ۇزدىكسىز اشىپ، فاكتورلاردى قار ويما جاسامپازدىعىنا ٴسىڭىرىپ، قار ويما سىندى كوركەمونەر فورماسى ارقىلى التايدىڭ كوركەم جاراتىلىستىق كورىنىسىن، وزگەشە حالىقتىق سالت ـ ساناسىن بۇكىل دۇنيە جۇزىنە ايگىلەيمىز.
放大
