ٴتىلشىمىز جاڭ نان، پراكتيكانت ٴتىلشى چىن كايجۇن
قازىر ەل ىشىندەگى باسقا قالالاردا كوكتەم لەبى ەسكەنىمەن، التاي اۋەلگىسىندەي اق قار جامىلىپ جاتىر. بۇل ارانىڭ ساپالى ٴارى ەرەكشە ۇزاققا سوزىلاتىن قار مەزگىلى كوپتەگەن ساياحاتشىنى قارلى ماۋسىمىنىڭ سوڭعى مەزگىلىندە كوكتەمگى قاردى تاماشالاۋعا باۋرادى.
3 ـ ايدىڭ 16 ـ كۇنى گەنەرال تاۋى حالىقارالىق قار شاڭعى دەمالىس رايونىنىڭ قار شاڭعى جابدىقتارى زالىنىڭ الدىندا 22 جاستاعى حۋبەيلىك بويجەتكەن مەي مەيجۋاننىڭ اسىنعان سومكەسى ەرەكشە كوزگە ٴتۇستى، سومكەسىنە ٴتۇرلى قۋىرشاق ىلىنگەن. ول قار شاڭعى اۋەسكەرلەرىنە ٴوزىنىڭ تۋىندىسىن كۇلىمسىرەي تانىستىرۋدا. ال، ونىڭ قوس قولى ٴبىر ٴسات تە دامىلدامادى. شەبەر ساۋساقتارىمەن لەزدە قوياننىڭ ەكى قۇلاعىن توقىپ شىقتى. مەي مەيجۋان بەينە جىلجىمالى دۇكەن سياقتى، ٴبىر سومكە، بىرنەشە قالتا ٴجۇن ٴجىپ، ماقتا وسىلار ونىڭ قاجەتتى ماتەريالى. ول التايدىڭ كورىنىس تۇيىندەرى بولعان قوم، جىكبەلەڭ، كوكتوعايدى ارالاپ، مەيلى قاي جەرگە بارسا دا ساۋداسىن توقتاتقان ەمەس.
بۇل ونىڭ التايعا كەلگەن 3 - جىلى، سونداي - اق ول توقىما ونەرىنە سۇيەنىپ شينجياڭدا تۇرمىس كەشىرگەن 3 - جىلى.
ول توقىما ارقىلى قاراپايىم ٴومىرىن كەستەلەدى
2023 - جىلى مەي مەيجۋان ۋحانداعى كەشكى بازاردا جايما اشادى. ول كەزدە ول توقىما توقۋدى ەندى عانا ۇيرەنىپ، شياۋحۇڭشۋداعى سۋرەتتى تۇسىندىرمەگە ىلەسىپ، بىرتىندەپ ىزدەنىس جاسايدى.
ول تىلشىگە: مۇنى ىستەۋدە شارشاپ ـ شالدىقپايمىن، جاساۋ بارىسى ٴىس جۇزىندە مەن ٴۇشىن دەمالىس سانالادى، وسى ونەرگە قىزىعۋشىلىق ماعان “رۋحاني ازىق” سيلاپ، قىسىمدى جەڭىلدەتتى، كوڭىلىمە تولارلىق توقىعان ونىمدەرىم شارشاعانىمدى بىرتىندەپ ۇمىت قىلادى، ـ دەدى.
2024 ـ جىلى ول قوم قىستاعىنداعى قوناقجايدا ٴبىر جاعىنان جۇمىس ىستەپ، ٴبىر جاعىنان جايما اشتى. قومنىڭ ۇزاق ٴارى تىنىش قىس ماۋسىمىندا ول قوناقجايدىڭ اس ۇيىندە كوكونىس تۋراپ، جەمىس ـ جيدەك دايىندايتىن. جۇمىستان ٴتۇسىپ، جاتاققا قايتىپ كەلگەننەن كەيىن ول توسەكتىڭ شەتىندە وتىرىپ الىپ، توقىماسىن توقيتىن. ول تىلشىگە: ٴبىر كىشكەنە قۋىرشاق توقۋعا 2 دە 3 ساعات، ۇلكەنىنە 5 تە 6 ساعات ۋاقىت جۇمسالادى، ۋاقىت بولسا بولعانى، مەن توقتاۋسىز توقي بەرەمىن، ـ دەدى.
كەيبىرەۋلەر ونىڭ كەسكىنىن ٴتۇسىرىپ توراپقا شىعاردى، وسىلايشا، ول بىرتىندەپ تانىلا باستادى.
2025 - جىلدىڭ سوڭعى كۇنى ول جۇمىسىنان ءبىرجولاتا قول ءۇزدى.
2026 ـ جىلى 1 ـ ايدىڭ 7 ـ كۇنى ”شياۋمەي قولونەر بۇيىمدارىن جاساۋ“ دۇكەنى جۇمىس باستادى. دۇكەن ونشالىق ۇلكەن ەمەس، ٴبىر قاتار اعاش ٴۇيدىڭ ورتاسىنداعى ورنالاسقان سىرتقا قاراي سوزىلعان زات سورەسىندە، جاسامپازدىقپەن تىزىلگەن، سۇيكىمدى قۋىرشاقتار ساياحاتشىلاردى بىردەن باۋرادى.
جۇمىس باستاعان كۇنى ول ەشقانداي سالت وتكىزبەدى، تەك بىرنەشە اي بويى توقىعان قۋىرشاقتارىن زات سورەسىنە ٴتىزىپ، بەينە ەكران ارقىلى دوۋيىنعا جولداپ: بۇگىن جۇمىس باستادىم، قومعا مەنى ىزدەپ كەلۋلەرىڭىزدى قارسى الامىن، ـ دەگەن ەدى. پىكىر اۋماعى تەز ارادا دۋمانعا بولەنىپ: اقىرى دۇكەن اشقان ەكەنسىڭ، بۇرىن قار شاڭعى جابدىقتارى زالىندا سەنى كورگەنمىن، ىستەرىڭنىڭ ىلگەرى بولۋىن تىلەيمىن، ـ دەگەن لەبىزدەر ٴتۇستى.
جىل قۇستارىنداي ساياحاتشىلار اعىنىنا قاراي ىلەستى
دۇكەنى اشىلدى، ول دا قاربالاستىعىن باستادى.
سونىمەن، مەي مەيجۋان سومكەسىن اسىنىپ، تاعى دا جولعا شىقتى، ول جىل قۇستارىنداي ساياحاتشىلار اعىنىنا قاراي ىلەستى. ول تىلشىگە: دۇكەن تۇراقتى، ال، مەن تۇراقتاپ تۇرمايمىن، جولاۋشى قاينارىن ىزدەۋىم كەرەك، ـ دەدى.
ول تىلشىگە: وسىنداي ۇلكەندەۋ قۋىرشاق كىرپىنىڭ ءىشى وتە نىعىز تولتىرىلسا، ونى قىسىپ ۇستاعاندا ساپاسى جاقسى سەزىلەدى، ـ دەدى. قۋىرشاق كىرپىنىڭ دەنەسى دومالاق، كوزىنە ەكى تال قارا بۇرشاق ورناتىلعان، اۋدارىپ قاراساڭىز، توقىلۋى ٴجيى ءارى بىركەلكى بولىپ، ۇزىك جىپتەرى جوق. ونىمدىلىكتى جوعارىلاتۋ ءۇشىن، ول “توبىمەن جاساۋ، شوعىرلى قۇراستىرۋ” ءادىسىن ويلاپ شىقتى، سونداي - اق كوپتەگەن قۋىرشاق بولشەكتەرىن جاساپ، ونان سوڭ، ءبىر - بىرلەپ قۇراستىرىپ، ۋاقىتتى ۇنەمدەۋمەن بىرگە، ءونىمنىڭ ساپاسىنا دا كەپىلدىك ەتتى.
تاپسىرىستىڭ كوبەيۋىنە بايلانىستى، جالعىز ادامنىڭ كۇشىنە عانا سۇيەنۋ قيىنعا سوقتى. بيىلدان باستاپ ول كەيبىر قاراپايىم تۇرلەرىن توقىما اۋەسكەرلەرىنىڭ جاساۋىنا تاپسىردى. ول تىلشىگە: مەن ۇلگىنى بەلگىلەپ، ولارعا جاساتتىرامىن، ءاربىر قۋىرشاققا بەرەتىن پايدا ۇلەسى بار، ـ دەدى. 4 ـ 5 ادام ونىڭ اۋىرتپالىعىن ءبولىپ ارقالاۋىنا كومەكتەسكەنىمەن، ءبىراق، ماڭىزدى، كۇردەلى جۇمىس ءتارتىبى ونىڭ ءوز قولىمەن جاساۋىن قاجەت ەتەدى. ول تىلشىگە: توراپتاستار تاپسىرىس بەرگەن ۇلگىنى ءوز قولىممەن جاسايمىن، بۇل سەنىمدى سەلگە كەتىرۋگە بولمايدى، ەرەكشە دەن قويىپ جاساۋىم كەرەك، ـ دەدى.
ونىڭ ەڭبەكشىلدىگى مەن زەرەكتىگى ساۋدانىڭ ورنىقتى قاداممەن جاقسارۋىنا مۇمكىندىك جاسادى: قۋىرشاق 15 يۋاننان 69 يۋانعا دەيىن تۇرلىشە باعادا ساتىلادى، ساۋداسى جاقسى كەزدە كۇنىنە 20 نەشە دانا ساتىلادى. ول تىلشىگە: ۇزدىكسىز قۇلشىنىپ، كىرىسىمدى اي سايىن ارتتىرۋعا تىرىسامىن، ـ دەدى.
قازىر ول دوۋيىن تەكشەسىندە توراپ دۇكەنىن اشىپ، ساتۋ ارناسىن اناعۇرلىم كەڭەيتۋدى جوسپارلاپ وتىر. بىرەۋلەر ودان: ءبىر كۇن تىكەڭنەن تىك تۇرعاندا شارشامايسىڭ با؟ ـ دەسە، ول: تۇرەگەپ جۇمىس ىستەۋ ءتىپتى دە قولايلى، كەيبىرەۋلەر قۋىرشاقتاردى كورگىسى كەلسە، بۇرىلىپ قارسى جاققا كورسەتە الامىن، شارشاسام تامعا سۇيەنىپ دەمالامىن، بوس وتىرمايمىن، ـ دەدى.
قارلى ماۋسىم اياقتاۋ الدىندا تۇر، ءبىراق، مەي مەيجۋاننىڭ كوكتەمى ەندى عانا باستالدى، كەلەسى قادامدا ول كوكتوعايعا بارماقشى، كۇن جىلىنعاننان كەيىن قومعا قايتىپ دۇكەندى رەتتەپ، جازعى ساياحاتتىڭ قاۋىرت مەزگىلىن قارسى الادى.
بۇل جۇمىس وزگەلەرگە جاپالى سەزىلگەنىمەن، ءبىراق، ول وسىنداي ەركىندىكتەن ءلاززاتتانادى. ول ءوزى ۇناتاتىن ءىستى ىستەپ، ينە - ءجىبىن قولىنا الىپ، ءاربىر قاراپايىم كۇندەرىن ءماندى دە ءساندى وتكىزۋدە.
放大
