گازەتىمىزدىڭ حابارى (ٴتىلشىمىز گۇزال ابدىرەشيت حابارلايدى). 1 - ايدىڭ 4 - كۇنى 2026 - جىلعى 3 -كەزەكتى حاربين قار ـ مۇز مادەنيەت مۇراجايىنىڭ قار ـ مۇز ويما شەبەرلەرى جارىسى حاربيننىڭ پيڭفاڭ رايونىندا اياقتادى، التاي ايماقتىق جۇمىسشى ۇيىمى ۋاكىلدەر ۇيىرمەسى اسا شەبەرلىكپەن جاساعان «ەركە سامال» اتتى قار ـ مۇز ويما تۋىندىسى قارا ٴۇزىپ العا شىعىپ، 2 ـ دارەجەلى سيلىقتى ەنشىلەپ، “جۇڭگوداعى قارلى مەكەن” التايعا داڭق اپەردى.
وسى كەزەكتى جارىسقا حيلۇڭجياڭ ولكەلىك مادەنيەت جانە ساياحات مەڭگەرمەسى جەتەكشىلىك ەتتى، حاربين قالالىق مادەنيەت، راديو ـ تەلەۆيزيا جانە ساياحات مەكەمەسى، پيڭفاڭ رايوندىق حالىق ۇكىمەتى ۇستىنە الىپ وتكىزدى، “قار ـ مۇز ەرتەگىلەرى . قار - مۇز ويما تۋىندىلارىن ساقتاۋ” نەگىزگى تاقىرىپ ەتىلدى، بۇل “مۇزدى القاپ، قارلى دالا دا باعالى بايلىق” ۇستانىمىن امالياتتا ايگىلەۋدىڭ جاندى امالياتى. جارىستا 20 ۋاكىلدەر ۇيىرمەسى بىرگە ونەر كورسەتىپ، 50 قار ـ مۇز ويما شەبەرى مۇزدى قاعاز، پىشاقتى قالام ەتىپ، قاقاعان ايازدا ٴداستۇرلى ونەر مەن وسىزامانعى رۋحتى توعىستىراتىن تاڭداۋلى قار ـ مۇز ويما كوركەمونەر تۋىندىلارىن جاراتتى. باعالاۋ بارىسىندا كوركەمدىك، شەبەرلىك، ورىنداۋ دارەجەسى قاتارلى كوپ جاقتىلى باعالاۋ جۇرگىزىپ، تەحنيكالىق نەگىزگە ٴمان بەرۋمەن بىرگە، تۋىندىنىڭ مادەنيەت ەستەمەسى مەن ٴداۋىر ەرەكشەلىگىن بەينەلەۋىنە دەم بەردى.
“ادامزاتتىڭ قار شاڭعى مەكەنى” التايدا وزگەشە قار - مۇز بايلىعى مەن مايەكتى قار - مۇز مادەنيەتى بار. وسى رەتكى سيلىققا يە بولعان تۋىندى «ەركە سامال» وڭىرلىك ەرەكشەلىك پەن ٴداستۇرلى ەستەتيكانى شەبەرلىكپەن توعىستىرىپ، “مولشىلىققا كەنەلۋ، جاراسىمدى قاتار ٴومىر ٴسۇرۋ” سىندى تاماشا مازمۇندى مۇز ويمامەن جاندى بەينەلەدى. بۇل التايدىڭ قار - مۇزىنىڭ كىرشىكسىزدىگىن ايگىلەۋمەن بىرگە، شەكارا وڭىردەگى حالىقتىڭ تاماشا تۇرمىسقا دەگەن تالپىنىسىن دا جەتكىزىپ، جارىسقا قاتىناسقان كوپتەگەن تۋىندىنىڭ اراسىندا ەرەكشە كوزگە ٴتۇسىپ، باعالاۋ كوميتەتى مەن ناق مايدانداعى كورەرمەندەردىڭ جاقسى باعاسىنا يە بولدى.
التاي ايماقتىق جۇمىسشى ۇيىمى ۋاكىلدەر ۇيىرمەسىنىڭ باستىعى يۋان ۋىنيۇي بىلاي دەدى: مەملەكەتتىك قار ـ مۇز ويما كوركەمونەر جارىسىندا سيلىققا يە بولۋ التايدىڭ قار ـ مۇز مادەنيەت جاسامپازدىعى قۋاتىن تۇراقتاندىرۋ بولىپ تابىلادى. وسى رەتكى جارىسقا قاتىناسۋ “جۇڭگوداعى قارلى مەكەننىڭ” مادەنيەت تارتىمدىلىعىن ايگىلەۋمەن بىرگە، جەر - جەردەگى كوركەمونەرشىلەرمەن اۋىس - كۇيىس جاساۋ تەكشەسىن ورناتتى. بولاشاقتا جەرگىلىكتى قار ـ مۇز مادەنيەتىن ۇزدىكسىز ايگىلەپ، ٴتىپتى دە كوپ ساپالى تۋىندى ارقىلى التاي حيكاياسىن ويداعىداي بايانداپ، قار- مۇز كاسىبى مەن مادەنيەت ىستەرىنىڭ توعىسپالى دامۋىنا دەم بەرەمىز.
ۇعىسۋعا قاراعاندا، سيلانعان تۋىندىلاردىڭ اۋەلگى نۇسقاسى مەن ۇلگىسى حاربين قار ـ مۇز مادەنيەت مۇراجايىندا ماڭگىلىك ساقتالىپ، قار ـ مۇز كوركەمونەرىنىڭ “كورىنىس كورمەسىنەن” “مادەنيەت قازىناسىنا” اينالۋىنىڭ ايعاعى بولادى ەكەن.
放大
