گازەتىمىزدىڭ حابارى (ٴتىلشىمىز گۇزال ابدىرەشيت حابارلايدى). 1 - ايدىڭ 5 - كۇنى اۆتونوميالى رايوندىق پارتكوم ۇگىت ٴبولىمىنىڭ جەتەكشىلىگىندە، اۆتونوميالى رايوندىق ادەبيەت ـ كوركەمونەرشىلەر بىرلەستىگى، شينجياڭ بيشىلەر قوعامى ۇيىمداستىرعان 4 ـ كەزەكتى شينجياڭ “تيانشان قارعالداعى سيلىعى” اتىنداعى كاسىپتىك ٴبي جارىسى شينجياڭ مادەنيەت سارايى تەاترحاناسىندا باستالدى. وسى رەتكى جارىسقا بۇكىل شينجياڭداعى 1500 دەن استام كاسىپتىك بيشىلەر قاتىناستى. التاي قارلى مەكەن مادەنيەت ويىن ـ ساۋىق شەكتى جاۋاپكەرشىلىك سەرىكتەستىگى تاڭداپ جىبەرگەن «كوش جولىنداعى ماحاببات»، «قارلىعاشتىڭ ورالۋى»، «اۋىلعا قايتقاندا» جانە التاي ايماقتىق ٴان ـ ٴبي ۇيىرمەسى تاڭداپ جىبەرگەن «كول سەرىسى اققۋ» اتتى 4 تۋىندى تاماشا ورىنداۋ شەبەرلىگىمەن قارلى مەكەن ٴبي كوركەمونەرىنىڭ وزگەشە تارتىمدىلىعىن شوعىرلى ايگىلەدى.
جارىس 4 كۇنگە جالعاسىپ، كاسىپتىك ورىن - ۇيىرمە گرۋپپاسى مەن كاسىپتىك مەكتەپ گرۋپپاسى (ورتا دارەجەلى كاسىپتىك مەكتەپتەردى قامتيدى) سىندى ەكى گرۋپپا قۇرىلىپ، ٴبي تۇرلەرى ۇلتتىق، حالىقتىق ٴبي، جۇڭگونىڭ كلاسسيكالىق ٴبيى، قازىرگى زامان ٴبيى، وسىزامانعى ٴبي، بالەت ٴبيى قاتارلىلاردى قامتىدى ٴارى تۇتاس بارىستا توراپتا تىكە تاراتىلدى.
سول كۇنى التاي قارلى مەكەن مادەنيەت ويىن - ساۋىق شەكتى جاۋاپكەرشىلىك سەرىكتەستىگى دايىنداعان «كوش جولىنداعى ماحاببات» ەڭ الدىمەن قويىلدى، بۇل تۋىندى ساحاراداعى كوشپەندى مادەنيەتتى شابىت ەتىپ، ارتيستەر ۇلتتىق ۇلگىدەگى كيىم كيىپ، ويناقى ٴبي فورماسى ارقىلى ساحارا ۇل ـ قىزدارىنىڭ ات قۇلاعىندا ويناعان اسقاق جىگەرى مەن اتا مەكەنىن قورعاعان سۇيىسپەنشىلىگىن جانە تىرشىلىك تىنىسى شالقىعان ساحارا تۇرمىسىن بەينەلەپ، ناق مايدانداعى باعالاۋشىلار مەن كورەرمەندەردىڭ قىزۋ قارسى الۋىنا يە بولدى.
1 - ايدىڭ 6 - كۇنگى 2 - مايدان جارىستا، التاي قارلى مەكەن مادەنيەت ويىن - ساۋىق شەكتى جاۋاپكەرشىلىك سەرىكتەستىگى «قارلىعاشتىڭ ورالۋى» جانە «اۋىلعا قايتقاندا» سىندى 2 تۋىندىنى ورىندادى. «قارلىعاشتىڭ ورالۋى» تۋىندىسى قارلىعاشتىڭ ۇياسىنا قايتۋى سىندى مازمۇندى ارقاۋ ەتىپ، اتا مەكەنگە دەگەن ماحاببات پەن تاماشا تۇرمىسقا دەگەن تالپىنىستى بەينەلەدى؛ «اۋىلعا قايتقاندا» تۋىندىسى تەرەڭ سۇيىسپەنشىلىككە تولى ٴبي ارەكەتىمەن اۋىلعا دەگەن سۇيىسپەنشىلىكتى بەينەلەدى. التاي ايماقتىق ٴان - ٴبي ۇيىرمەسى دايىنداعان «كول سەرىسى اققۋ» تۋىندىسى دا سول كۇنى قويىلدى. بۇل تۋىندى جاس قىزدىڭ كىرشىكسىزدىگى مەن اققۋدىڭ پاكتىگىن ٴوزارا توعىستىردى، ساحنادا تىنىش اسپان استىندا اققۋ قاناتىن جايىپ، كوككە سامعادى، كۇن نۇرى بايتاق دالاعا شۋاعىن شاشىپ، كول سۋى ايناداي جارقىراپ كوركەم كورىنىس قالىپتاستىرىپ، ٴبيشىنىڭ جاندى ارەكەتىمەن جاراسىم تاپتى.
ۇعىسۋعا قاراعاندا، تۋىندى جيناۋ قىزمەتى باستالعاننان بەرى، جارىستى ۇيىمداستىرۋشى جاق بۇكىل شينجياڭنىڭ جەر ـ جەرىندەگى قاتىستى ورىندار جولداعان 243 تۋىندىنى تاپسىرىپ العان، قاتاڭ تۇردەگى العاشقى باعالاۋ جانە قايتا باعالاۋ ارقىلى 87 تۋىندى سوڭعى باعالاۋعا تاڭدالعان. التاي ايماعىنان 4 تۋىندى سوڭعى باعالاۋعا قاتىناستى ءارى شوعىرلى جارىسقا قاتىناسىپ، التاي ٴبي كوركەمونەر جاسامپازدىعىنىڭ جالىندى ومىرشەڭدىك كۇشىن تولىق ايگىلەدى.
放大
