گازەتىمىزدىڭ حابارى (ءتىلشىمىز جاڭ نان، پراكتيكانت ءتىلشى ماحاينا ماگىر قىزى حابارلايدى). 1- ايدىڭ 6 - كۇنى التاي ايماقتىق قوعام حاۋىپسىزدىگى مەكەمەسى مەن ءۇرىمجى قالالىق قوعام حاۋىپسىزدىگى مەكەمەسى التاي قارلى مەكەن تەاترحاناسىندا ”تۋدى بيىك كوتەرە ەكپىندەي ىلگەرىلەپ، ادالدىقتى سومداپ، قايراتتانا العا تارتىپ، جاڭا تاراۋ جازايىق“ تاقىرىبىنداعى ادەبيەت - كوركەمونەر كونسەرتىن وتكىزىپ، 6 - رەتكى جۇڭگو حالىق ساقشىلارى مەرەكەسىن بىرگە قۇتتىقتادى. ەكى جەردەگى قوعام حاۋىپسىزدىگىندەگى حالىق ساقشىلارى، كومەكشى ساقشىلارىنىڭ ۋاكىلدەرى، قاھارمان ۇلگىلەر، ەڭبەك كورسەتىپ سيلانعانداردىڭ ۋاكىلدەرى، دەمالىسقا، پەنسياعا شىققان قارت كادرلار، ساقشى وتباسىنىڭ ۋاكىلدەرى جانە ءار سالاداعى سيلى قوناقتار ءبىر اراعا باس قوسىپ، حالىق ساقشىلارىنىڭ داڭقتى مەرەكەسىن بىرگە قۇتتىقتادى.
كونسەرت «حالىق قوعام حاۋىپسىزدىگى سالاسىنداعىلار العا تارتىپ بارادى» اتتى ايبىندى توپتىق حورمەن باستالدى. ءان - ءبي، سايىسكەرلىك، كورىنىستىك تەاتر، ولەڭ وقۋ، كۇي ورىنداۋ قاتارلى 17 تارتىمدى ويىن نومىرلەرى ارت - ارتىنان ساحنادا قويىلىپ، كورەرمەندەرگە حالىق ساقشىلارىنىڭ تىلەگىن ۇيىستىراتىن كوڭىل جەلپىندىرەتىن مادەنيەت سالتاناتىن سيلادى.
كولەمدى ءان - ءبي «جۇڭگو ارمانىن بىرگە سومداۋ» ەكى جەردەگى قوعام حاۋىپسىزدىگى حالىق ساقشىلارىنىڭ ۇلتتىڭ گۇلدەنۋىن قورعاۋداعى بەرىك سەنىمىن ايگىلەدى؛ كورىنىستىك تەاتر «بار پەيىلمەن ساياحاتشىلارعا قورعاۋشى بولۋ، كوركەم كورىنىس، ارداقتى ساقشىلار» قوعام حاۋىپسىزدىگى ورگاندارىنىڭ ساياحات ساقشى ىستەرى ۇلگىسىندە جاڭالىق اشۋىنىڭ، جوعارى ساپالى دامۋعا قىزمەت وتەۋىنىڭ جاندى امالياتىن ءتۇسىندىردى؛ «ساقشىلاردىڭ قارلى القاپتا سومدالعان ادالدىعى» اتتى ولەڭ ارقىلى قوعام حاۋىپسىزدىگىندەگى حالىق ساقشىلارى مەن كومەكشى ساقشىلارىنىڭ نەگىزگى ساتىعا تامىر تارتىپ، قالتقىسىز ۇلەس قوسقان ادالدىق قاسيەتىن تەرەڭ سۇيىسپەنشىلىكپەن جىرلادى؛ ۇلتتار ىنتىماعى مەن وڭىرلىك سالت ـ سانا توعىسۋىنىڭ جاراسىمدى سيمفونياسىن دومبىرادا توپتىق ورىندادى. ءۇرىمجى قالالىق قوعام حاۋىپسىزدىگى مەكەمەسى دايىنداعان «مۇراگەرلىك ەتۋ» ءبيى، «ەڭ سۇلۋ» ءانى قاتارلى نومىرلەر كاسىپتەس ورىنداردىڭ تەرەڭ كوركەمونەرلىك ەرەكشەلىگى مەن اسقاق رۋحاني بەت ـ بەينەسىن تولىق ايگىلەدى. ەكى جەردەگى قوعام حاۋىپسىزدىگىندەگى ساقشىلارى مەن حالىق كومەكشى ساقشىلار ساحنانى دۋمانعا بولەپ، شىنايى ىقپالداسىپ، ناق مايداندى قىزۋ ورلەۋگە كوتەردى.
التاي ايماقتىق قوعام حاۋىپسىزدىگى مەكەمەسى قاناس كورىنىس رايونى بولىمشە مەكەمەسى قاتىناس باسقارۋ ۇلكەن اترەتىنىڭ اترەت باستىعى ساۋ جيانچياڭ ەڭبەك كورسەتىپ، سيلانعانداردىڭ ۋاكىلى رەتىندە كونسەرتتى كورگەننەن كەيىن تىلشىگە: وسىنداي جوعارى دەڭگەيدەگى ادەبيەت ـ كوركەمونەر كونسەرتىن تاماشالاعانىمدى ەرەكشە داڭق ساناپ، جىلۋلىق سەزىندىم. ويىن نومىرلەرى كوركەمونەر فورماسىمەن تىنىشتىقتى قورعاۋداعى كۇندەلىكتى ۇساق - تۇيەك ىستەرىمىزدى بەينەلەپ قانا قالماستان، وسى كاسىپتىڭ وسكەلەڭ قۇنىن دا جوعارىلاتتى. ەكى جەردەگى حالىق ساقشىلارى مەن كومەكشى ساقشىلار ساحنادا ويىن قويىپ، قوعام حاۋىپسىزدىگى قوسىنىنىڭ ىنتىماعى مەن كۇش ـ قۋاتىن تەرەڭ سەزىندىردى. بۇل شابىتتاندىرۋ بۇدان بىلايعى قىزمەتتە ۇدەرە العا تارتۋدىڭ، تاعى دا تىڭ ۇلەس قوسۋدىڭ سارقىلماس قوزعاۋشى كۇشىنە اينالادى، ـ دەدى.
بۋرىلتوعاي اۋداندىق قوعام حاۋىپسىزدىگى مەكەمەسى پارتكومىنىڭ مۇشەسى، ورىنباسار مەكەمە باستىعى حۋاڭ كاي تەبىرەنە تىلشىگە: ءۇرىمجى قالالىق قوعام حاۋىپسىزدىگى مەكەمەسى دايىنداعان ءبي «مۇراگەرلىك ەتۋ» ماعان وسى كاسىپتىڭ اۋىر جۇگىن تاعى ءبىر رەت سەزىندىردى. نەگىزگى ساتى قىزمەت ورنى قاراپايىم بولعانىمەن، جاۋىنگەر سەرىكتەرىم جاۋاپكەرشىلىك ارقالاۋ ارقىلى قاراپايىمدىلىقتى نۇر ـ شۇعىلاعا اينالدىردى. ءبىز ساحناداعى اسەرلى سەزىمدى بۇقاراعا قىزمەت وتەۋدىڭ ءىس جۇزىندىك ارەكەتىنە اينالدىرىپ، حالىق ەڭ قاجەت ەتكەن جەرگە باستان ـ اياق تامىر تارتامىز، ـ دەدى.
وسى رەتكى ادەبيەت ـ كوركەمونەر كونسەرتى شات ـ شادىمان، دۋماندى مەرەكەلىك راي قالىپتاستىرۋمەن بىرگە، التاي مەن ءۇرىمجى ەكى جەردەگى قوعام حاۋىپسىزدىگى ورگاندارىنىڭ مادەنيەت اۋىس ـ كۇيىسىن تەرەڭدەتىپ، دوستىق سۇيىسپەنشىلىكتى نىعايتىپ، ساقشىلاردىڭ تىلەگىن اناعۇرلىم ۇيىستىرىپ، جاۋىنگەرلىك جىگەردى تاسقىنداتىپ، قوعام حاۋىپسىزدىگى قىزمەتىنىڭ وسىزاماندانۋىن جاپپاي ىلگەرىلەتۋگە پارمەندى رۋحاني قوزعاۋشى كۇش قوستى.
بۇل بەتتەگى سۋرەتتەردى تۇسىرگەن پراكتيكانت ءتىلشى ماحاينا ماگىر قىزى
放大
