گازەتىمىزدىڭ حابارى (پراكتيكانت ءتىلشى باۋ حۇڭۇي حابارلايدى). 11 - ايدىڭ 24 - كۇنى تۇستەن كەيىن التاي گەنەرال تاۋى قار شاڭعى الاڭىنا ارناۋلى الەۋمەتتىك اۆتوبۋز قاتىناپ، گەنەرال تاۋى حالىقارالىق قار شاڭعى دەمالىس رايونىنا بارىپ - قايتاتىن قار شاڭعى اۋەسكەرلەرىنە قولايلىلىق جاراتتى.
قار شاڭعى الاڭى ارناۋلى الەۋمەتتىك اۆتوبۋزى التاي قالاسى ازات جولى ساۋدا شەڭبەرى پارتيا مۇشەلەرى مەن بۇقاراعا قىزمەت وتەۋ ورتالىعىن باستالۋ ءتۇيىنى ەتىپ، جول بويى بوكى ياڭگۋاڭ قوناق ءۇيى، شانلۋ قوناق ءۇيى، تايشي قوناق ءۇيى قاتارلى ايالدامالاردى باسىپ ءوتىپ، التاي گەنەرال تاۋى حالىقارالىق قار شاڭعى دەمالىس رايونىنىڭ كىرەر اۋزىنا جەتەدى. قوس باعىتتا قاتىنايدى، ءار كۇنگى قاتىناۋ ۋاقىتى تاڭەرتەڭ قار شاڭعى الاڭى اشىلعاننان كەشكى قار شاڭعى الاڭى جابىلعانعا دەيىن، كۇندىز ەمىن - ەركىن قار شاڭعى تەبۋدەن تۇنگى قار شاڭعى تەبۋدىڭ قىزىعىن سەزىنەتىن جالپى ۋاقىت مەزگىلىن تولىق قامتيدى؛ اۆتوبۋز جارىم ساعاتتا ءبىر رەت قاتىنايدى، بەلەت باعاسى 2 يۋان، جولاۋشىلار ۋيشين نەمەسە جىفۋباۋ ارقىلى ەكىلىكتى جايمالاپ اقى تولەۋگە بولادى، باعاسى ارزان ءارى قولايلى.
التاي قالاسى ليجۇڭ الەۋمەتتىك قاتىناس شەكتى سەرىكتەستىگى جول اترەتىنىڭ باستىعى جاڭ حۇڭمين بىلاي دەدى: قار شاڭعى اۋەسكەرلەرىنىڭ قاتىناس حاۋىپسىزدىگىنە كەپىلدىك ەتۋ ءۇشىن، ءبىز كوپ جىلدىق شوفەرلىك ستاجى بار، قىسقى قار ـ مۇز جولىنىڭ جاعدايىنا قانىق شوفەرلەردى تاڭداپ جىبەردىك، شوفەرلىك تاجىريبەسى توتەنشە مول. تۇراقتى ايالدامادا توقتاۋدان سىرت، جول بويىندا الەۋمەتتىك اۆتوبۋز توسقاندار كەزىكسە ورتا جولدا دا توقتايدى. بۇدان بىلاي ءبىز قار شاڭعى اۋەسكەرلەرىنىڭ اعىس مولشەرىنىڭ وزگەرىسىنە قاداعالاي نازار اۋدارىپ، ءىس جۇزىندىك جاعدايعا قاراي اۆتوكولىكتەردىڭ تاسىمال قۋاتىن دەر كەزىندە رەتتەپ، كوپشىلىكتىڭ قاتىناس ىركىلىسسىزدىگىنە كەپىلدىك ەتەمىز.
التايدىڭ مەيىرگە تولى قىزمەت وتەۋى الەۋمەتتىك قاتىناس لەنياسىمەن عانا شەكتەلمەيدى. ارناۋلى لەنيانىڭ باستالۋ ءتۇيىنى بولعان ازات جولى ساۋدا شەڭبەرى پارتيا مۇشەلەرى مەن بۇقاراعا قىزمەت وتەۋ ورتالىعى جاعدايعا قاراي قار شاڭعى اۋەسكەرلەرىنىڭ “مەيىرگە تولى كولىك كۇتۋ ايالداماسىنا” اينالدى.
“قار شاڭعى اۋەسكەرلەرى تاڭەرتەڭ ۇيدەن ەرتە شىعىپ، كەشتە جاي قايتادى، اۆتوكولىك كۇتۋ ارەدىگىندە توڭىپ، قول تەلەفونىنىڭ توگى دە وڭاي تاۋسىلادى، قار شاڭعىنى دا الىپ ءجۇرۋ قيىن. سوندىقتان، ءبىز قايناق سۋمەن جانە جايلى دەمالىس ورنىمەن ازىرلەپ، قول تەلەفون زارياتتاۋ، قار شاڭعى ساقتاۋ قاتارلى قىزمەت وتەۋلەرمەن قامداپ، كوپشىلىكتىڭ اۆتوكولىكتى جانعا جايلى جىلى ورتادا كۇتۋىنە مۇمكىندىك جاسادىق”، ـ دەدى ازات جولى كوشە ءىس باسقارماسىنىڭ كادرى گۇزالنۇر قۇربان تانىستىرىپ.
“قولايلى ارناۋلى لەنيادان” “مەيىرگە تولى ايالداماعا” دەيىن التاي ناقتى ىستەر ارقىلى قار شاڭعى اۋەسكەرلەرىنە دەگەن شىنايىلىعىن ايگىلەپ، وسى قىستا قار شاڭعى تەبۋ ساپارىنىڭ ءساتتى باستالۋىنا مۇمكىندىك جاسادى.
放大
