شەكارادان كىرگەن جولاۋشىلار التايداعى ەكى شەكارا وتكەلىنىڭ ەتەنە قىزمەت وتەۋىن القادى

　　گازەتىمىزدىڭ حابارى (پراكتيكانت ٴتىلشى ۋاڭ جيڭحۇڭ، ەرىكتى تىلشىلەر لين چاڭباي، لي سىن حابارلايدى).  11 - ايدىڭ 20 - كۇنىنەن باستاپ مەملەكەتتىك كوشى - قون باسقارۋ مەكەمەسى بۇكىل ەل كولەمىندە شەتەلدىكتەردىڭ شەكارادان كىرۋ كارتوچكاسىن قاعازسىز مالىمدەۋ رەفورماسىن رەسمي اتقاردى. شەتەلدىكتەر جۇڭگوعا كەلۋدەن بۇرىن جۇڭگو مەملەكەتتىك كوشى - قون باسقارۋ مەكەمەسىنىڭ ۇكىمەت توراپ بەكەتى، اكىمشىلىك قىزمەت وتەۋ تەكشەسى، “كوشى - قون باسقارۋ مەكەمەسىنىڭ 12367” APP جانە ۋيشين (جىفۋباۋ) شاعىن باعدارلاماسى، قول تەلەفون كليەنتى ارقىلى شەكارادان كىرۋ كارتوچكاسىن تولتىرۋ ەكىلىگىن جايمالاۋ سياقتى ارنالار ارقىلى شەكارادان كىرۋ ينفورماتسياسىن جەلىدە تولتىرۋىنا بولادى. توراپتا شەكارادان كىرۋ كارتوچكاسىن تولتىرۋدى ىستەي المايتىن شەتەلدىكتەر جۇڭگو شەكارا وتكەلىنىڭ شەكارادان كىرىپ - شىعۋ شەكارا قورعانىس تەكسەرۋ ناق مايدانىنا جەتكەندە، قول تەلەفون ارقىلى ەكىلىكتى جايمالاۋ نەمەسە ناق مايدانداعى زەردەلى جابدىقتاردان پايدالانىپ، شەكارادان كىرۋ ينفورماتسياسىن توراپتا تولتىرۋىنا نەمەسە شەتەلدىكتەردىڭ شەكارادان كىرۋ قاعاز كارتوچكاسىن تولتىرۋىنا بولادى.

　　11 - ايدىڭ 21 - كۇنى تايكەشكەن شەكارا وتكەلىندەگى جولاۋشىلاردى تەكسەرۋ ورنىندا موڭعۇليالىق ٴبىر توپ جولاۋشى شەكارالىق تەكسەرۋ حالىق ساقشىلارىنىڭ جەتەكشىلىگىندە الدىن الا دايىنداپ قويعان شەكارادان كىرۋ ٴوتىنىش ينفورماتسياسىن قول تەلەفونمەن ەكىلىكتى جايمالاپ جىلدام كورسەتىپ، زەردەلى جابدىقتاردىڭ تەكسەرۋىنەن كەيىن كەدەننەن ٴساتتى ٴوتتى، بۇل “شەتەلدىكتەردىڭ شەكارادان كىرۋ كارتوچكاسىن توراپتا تولتىرۋ” سىندى قولايلى جاڭا ساياساتتىڭ تايكەشكەن شەكارا وتكەلىندە ورنىقتى تياناقتانعانىن كورسەتەدى. تۇڭعىش توپتاعى شەكارادان كىرگەن جولاۋشىلار جاڭا ساياساتتىڭ ونىمدىلىگى مەن قولايلىلىعىن شىنايى سەزىندى.

　　“بۇل شارا راسىندا كەرەمەت بولدى! جۇڭگوعا بارعاننان كەيىن قاعاز جۇزىندەگى كەستە تولتىرۋ ٴۇشىن قاتارعا تۇرمايتىن بولدىق، كەدەننەن ٴوتۋ تەز بولدى!” قازاقستاننان كەلگەن 3 جولاۋشى جاڭا شارانى وسىلاي القادى. ولار اۆتوكولىككە وتىرۋدان بۇرىن “كوشى - قون باسقارۋ مەكەمەسىنىڭ 12367” APPى ارقىلى شەكارادان كىرۋ ينفورماتسيا كارتوچكاسىن تولتىردى، ٴسويتىپ، شەكارادان كىرۋ بارىسى “ىركىلىسسىز، كەدەرگىسىز بولدى”.

　　تايكەشكەن شەكارا وتكەلى　　 جۇڭگو ــ موڭعۇليا شەكاراسىنىڭ ماڭىزدى ارناسى رەتىندە ەكى ەلدىڭ ەكونوميكا ـ ساۋدا بارىس ـ كەلىسى مەن ادامداردىڭ اۋىس ـ كۇيىسىنىڭ كۇن سايىن ارتۋىنا بايلانىستى، وتكەلدىڭ جولاۋشى مولشەرى ورنىقتى ارتتى. ٴداستۇرلى قاعاز جۇزىندە مالىمدەۋ ۇلگىسى قاۋىرت مەزگىلدە كەدەننەن ٴوتۋ ونىمدىلىگىنە ىقپال جاسايتىن بۋىنعا اينالدى. توراپتا تولتىرىپ - مالىمدەۋ جاڭا ساياساتىنىڭ اتقارىلۋى كەدەننەن ٴوتۋدى قولايلىلاندىرۋ قاجەتىنە دالمە ـ ٴدال سايكەسىپ، “ينتەرنەت + ۇكىمەتتىك قىزمەت وتەۋ” ۇلگىسىنە سۇيەنىپ، “ينفورماتسيانى الدىن الا تولتىرۋ، جولاۋشىلاردى كەدەننەن تەز وتكىزۋدى” جۇزەگە اسىرىپ،  جولاۋشىنىڭ تەكسەرۋ ۋاقىتىن ونان ارى قىسقارتىپ، كەدەننەن ٴوتۋ ونىمدىلىگىن كورنەكتى جوعارىلاتتى.

　　11 ـ ايدىڭ 23 ـ كۇنى جەمەنەي شەكارا وتكەلى قاربالاس ٴارى ٴتارتىپتى كەدەننەن ٴوتۋ جاعدايىندا بولدى، كوپتەگەن جولاۋشىلار شەكارادان كىرۋ كارتوچكاسىن توراپتا تولتىرۋدى الدىن الا ىستەدى. “تەكسەرۋ ارناسىنا ەكىلىك جاپسىرىلعان، ەكىلىكتى جايمالاعاننان كەيىن قول تەلەفوندا شەكارادان كىرۋ كارتوچكاسىن تولتىرۋعا بولادى، بۇل ٴارى ۋاقىتتى ۇنەمدەيدى ٴارى وتە قولايلى”، ـ دەدى قازاقستاندىق ساياحاتشى مادەت ادەكوۆ.

　　قاعاز جۇزىندەگى شەكارادان كىرۋ كارتوچكاسىمەن سالىستىرعاندا، توراپتا  تولتىرۋ ٴتاسىلى ٴتىپتى دە يكەمدى، ينفورماتسيانى تولتىرۋ ٴتىپتى دە زەردەلى، كەدەننەن ٴوتۋ ٴتىپتى دە قولايلى. سونىمەن بىرگە، 11 - ايدىڭ   20 - كۇنىنەن باستاپ شەكارادان ۆيزاسىز كىرگەن جولاۋشىلار دا شەكارادان كىرۋ كارتوچكاسىن تولتىرىپ مالىمدەۋى تالاپ ەتىلدى.

　　ساياساتتىڭ تياناقتانۋىنا كەپىلدىك ەتۋ ٴۇشىن، جەمەنەي شەكارادان كىرىپ - شىعۋ شەكارا قورعانىس تەكسەرۋ پۋنكتى ٴارقايسى جولاۋشى تاسىمال سەرىكتەستىگىمەن بىرلەسىپ، شەكارا سىرتىندا اۆتوكولىك كۇتۋ بۋىندارىندا شەكارادان كىرۋ كارتوچكاسىن تولتىرۋ ەسكەرتۋىن ورىستەتىپ، كوپ تىلدە ەسكەرتۋ، قىزمەتكەرلەر جەتەلەۋ سياقتى تاسىلدەر ارقىلى ساياحاتشىلاردىڭ  كەدەننەن تەز ٴوتۋىن جۇزەگە اسىرۋىنا كومەكتەستى. بۇدان تىس، جەلىدە تولتىرۋعا قانىق ەمەس ٴىشىنارا جولاۋشىلارعا قاراتا شەكارا وتكەلى مالىمەت تولتىرۋعا جەتەكشىلىك ەتۋ قىزمەت وتەۋ ورنىن ارناۋلى قۇرىپ، قىزمەتكەرلەردى ٴبىر - بىردەن جەتەكشىلىك ەتۋگە ورنالاستىرىپ، شەكارادان كىرگەن بارلىق شەتەلدىك جولاۋشىلاردىڭ “شەكارادان كىرۋ كارتوچكاسىن جەلىدە الدىن الا تولتىرۋ، كەدەننەن تەز ٴوتۋدى سەزىنۋ” قولايلىلىعىنان يگىلىكتەنۋىن بار كۇشپەن قامتاماسىزداندىردى.

　　جىل باسىنان بەرى، جۇڭگونىڭ  ٴبىر تاراپتى ۆيزا كەشىرىم ەتۋ، سونداي - اق قاتىستى ەلدەرمەن ٴوزارا ۆيزا كەشىرىم ەتۋ ساياساتىنىڭ ىركەس - تىركەس ورتاعا قويىلۋىنا، مەملەكەتتىك كوشى - قون باسقارۋ مەكەمەسىنىڭ كەدەننەن ٴوتۋدى قولايلىلاندىرۋ شارالارىن ۇزدىكسىز رەتتەپ، ساپالىلاندىرۋىنا بايلانىستى، حالىقارالىق ساياحاتشىلار كوبەيدى، بيىل 11 - ايدىڭ باسىنا دەيىن جەمەنەي شەكارادان كىرىپ - شىعۋ شەكارا قورعانىس تەكسەرۋ پۋنكتى شەكارادان كىرىپ - شىققانداردان 92 مىڭنان استام ادامدى (رەت)، 18 مىڭنان استام قاتىناس قۇرالىن تەكسەرىپ وتكىزىپ، كەدەننەن ٴوتۋ جالپى تۇلعالىق ونىمدىلىگى ۇزدىكسىز جوعارىلادى.

　　پارتيا 20 - كەزەكتى ورتالىق كوميتەتىنىڭ ٴتورتىنشى جالپى ٴماجىلىسى “15 - بەسجىلدىق” كەزىندە جوعارى دەڭگەيدەگى سىرتقا ەسىك اشۋدى كەڭەيتۋ، سەلبەسىپ تەڭ يگىلىككە كەنەلۋدىڭ جاڭا جاعدايىن اشۋ جونىندە ستراتەگيالىق جوبا جاسادى. وسى رەتكى شەتەلدىكتەردىڭ شەكارادان كىرۋ كارتوچكاسىن قاعازسىز مالىمدەۋ جاڭا ساياساتىنىڭ جاپپاي تياناقتانۋى ايماقتاعى ٴار دارەجەلى قاتىستى تاراۋلاردىڭ (ورىن) جالپى ٴماجىلىستىڭ رۋحىن ىشكەرىلەي ۇيرەنىپ، دايەكتىلەندىرىپ، “ٴبىر بەلدەۋ، ٴبىر جول” قۇرىلىسىمەن بەلسەنە توعىسۋىنىڭ ناقتى امالياتى. بۇل شارا التاي ايماعىندا كەدەننەن ٴوتۋ ونىمدىلىگىن ونان ارى جوعارىلاتىپ، جۇڭگولىقتاردىڭ، شەتەلدىكتەردىڭ بارىس ـ كەلىسىنە اناعۇرلىم قولايلى قىزمەت وتەپ، التاي ايماعىنىڭ حالىقارالىق ماڭداي الدى  شارۋاشىلىق ساۋدا ورتاسى مەن سىرتقا ەسىك اشۋ بيىگىن ۇزدىكسىز قالىپتاستىرۋىنا دەم بەرەدى.