گازەتىمىزدىڭ حابارى (ءتىلشىمىز دۇڭ شىجۇي، ەرىكتى ءتىلشى لي مىڭتيڭ حابارلايدى). قۇربان ايت دەمالىسىندا التاي مول ساياحات بايلىعى مەن الۋان ءتۇرلى ساياحات تاسىلىنە سۇيەنىپ كوپتەگەن ساياحاتشىنى وزىنە باۋرادى. كەشكى بازار ارالاۋ، جۇلدىزدى اسپان لاگەرى، ۇيشە اۆتوكولىكپەن ساياحاتتاۋ قاتارلى ەرەكشە ساياحات ٴتۇرى ساياحاتشىلاردىڭ جەرگىلىكتى ورىننىڭ سالت ـ ساناسىن سەزىنۋدەگى، دەمالىستان ءلاززاتتانۋداعى دۇرىس تالعامىنا اينالدى.
6 ـ ايدىڭ 9 ـ كۇنى التاي قالاسى لاستى اۋىلى بەيشان جۇلدىزدى اسپان لاگەرىندە كوگالدا شاتىر تىگىلىپ، كوپتەگەن ساياحاتشى وسى جەرگە دەمالىستان ءلاززاتتانۋعا كەلدى.
التاي قالاسىنىڭ تۇرعىنى ماقسات اۋباكىر ۇلى بىلاي دەدى: بۇل ارانىڭ ورتاسى جانعا جايلى ءارى كوركەم. كۇندىز دوستارىممەن بىرگە كوگالدا قاقتاما قاقتايمىز، كەشتە جۇلدىزدى اسپاندى تاماشالايمىز.
وسى لاگەردىڭ جاۋاپتىسى حۋ ياجوۋ بىلاي دەدى: جاز كەلگەننەن بەرى لاگەرگە كەلگەن ساياحاتشىلاردىڭ سانى كورنەكتى ارتتى. ءبىز سايكەستى قۇرىلعىلاردى ۇزدىكسىز كەمەلدەندىرىپ، تاماشالاۋ اۋماعى، كوڭىل اشۋ اۋماعى، وتباسىنداعىلار سەيىلدەۋ اۋماعى، بارىپ كورۋ ءتۇيىنى قاتارلىلاردى ورنالاستىردىق.
بۇدان سىرت، ءوزى اۆتوكولىك جۇرگىزىپ التايعا ساياحاتتاي كەلگەن ساياحاتشىلار دا از ەمەس. التاي قالاسىنداعى ءمالىم ءبىر ۇيشە اۆتوكولىك لاگەرىندە جەر ـ جەردەن كەلگەن اۆتوكولىك تارتىپپەن توقتاپ، ساياحاتشىلار لاگەردە دەمالىپ، ساياحاتتان العان اسەرىن اڭگىمەلەدى.
حىناننان كەلگەن ساياحاتشى جوۋ ليۋ ـ ي بىلاي دەدى: بۇل لاگەر قىران وزەنىنە جاقىن، نار وركەشپەن ىرگەلەسىپ جاتادى، جانىندا اققايىڭ باقشاسى بار، كورىنىسى وتە كوركەم! بۇل ارادا تاعى توڭازتقىش، ميكرو تولقىندى مەش قاتارلى تۇرمىستىق قۇرىلعىلار ورناتىلعان. بۇل ءبىز سياقتى ءوزى اۆتوكولىك جۇرگىزىپ ساياحاتتاۋشىلار جونىنەن العاندا وتە قولايلى.
ىمىرت ۇيىرىلىسىمەن التاي قالاسى ازات جولىنىڭ الەۋمەتتىك اۋماقتاعى كورشىلەر جۇلدىزدى اسپان كەشكى بازارى، ءدامدى تاعامدار جايماسىنىڭ الدى قوناقتارعا تولدى، ساۋداگەرلەر قاربالاستىققا ءتۇسىپ، كەشكى بازار دۋمانعا بولەندى.
“بۇل جەر ءبىز تۇرعان قوناقجايعا وتە جاقىن، كاۋاپ، پالاۋ قاتارلى ەرەكشە ءدامدى تاعامنىڭ ءبارى بار، عيماراتتان ءتۇسىپ بىرنەشە ادىم جۇرسەڭىز، شينجياڭنىڭ ناعىز ءدامدى تاعامىنان ءدام تاتا الادى ەكەنسىز”، ـ دەدى ۇرىمجىدەن كەلگەن ساياحاتشى ياڭ حۇڭمەي.
وسى كەشكى بازاردىڭ جاۋاپتىسى قۋات قاليقان ۇلى بىلاي دەدى: وسى بىرنەشە كۇندە ساۋدامىز ەرەكشە كۇسەت بولدى. قالا تۇرعىندارى مەن ساياحاتشىلاردىڭ قاجەتىن قاناعاتتاندىرۋ ءۇشىن، ءبىز تاعامنىڭ ءتۇرىن كوبەيتتىك، سونداي ـ اق تاماقتاناتىن ادام سانىنا قاراي تاماقتانۋ اۋماعىن كەڭەيتتىك.
放大
