گازەتىمىزدىڭ حابارى (پراكتيكانت تىلشىلەر باۋ حۇڭيۇي، ۋاڭ جيڭحۇڭ حابارلايدى). جيلين ولكەلىك عىلىم ـ تەحنيكا قوعامىنىڭ 2024 ـ جىلعى عىلىم ـ تەحنيكا ارقىلى شينجياڭعا كومەكتەسۋ قيمىلى جونىندەگى اۋىس ـ كۇيىس اڭگىمە ٴماجىلىسى 12 ـ ايدىڭ 26 ـ كۇنى التاي قالاسىندا اشىلدى. ايماقتىق پارتكومنىڭ ورىنباسار شۋجيى، ايماقتىق اكىمشىلىك مەكەمەسىنىڭ ٴۋاليى جەڭىس قادىس ۇلى ماجىلىسكە قاتىناستى ٴارى ٴسوز سويلەدى. ايماقتىق پارتكومنىڭ ورىنباسار شۋجيى، جيلين ولكەلىك شينجياڭعا باعىتتامالى كومەكتەسۋ قىزمەتى الدىڭعى شەپ قولباسشىلىق شتابىنىڭ باس قولباسشىسى سۇڭ چياڭ ٴماجىلىستى باسقاردى.
ماجىلىستە ايماقتىق پارتكومنىڭ مۇشەسى، باس حاتشى، ۇگىت ٴبولىمىنىڭ باستىعى لان شىڭشين التاي ايماعىنىڭ نەگىزگى احۋالىن تانىستىردى؛ رەسەي عىلىم اكادەمياسىنىڭ شەتەلدىك اكادەميگى، بايچىڭ قالالىق ساياسي كەڭەستىڭ ورىنباسار ٴتوراعاسى، اۋىل شارۋاشىلىعى عىلىم اكادەمياسىنىڭ زەرتتەۋشىسى رىن چاڭجۇڭ جانە جيلين ولكەسىندەگى 12 اكادەميك، مامان التاي ايماعىنىڭ عىلىم ـ تەحنيكادا جاڭالىق اشا دامۋى جونىندە سەلبەستىك جاساسۋ ۇسىنىسىن العا قويدى؛ جيلين ولكەلىك عىلىم ـ تەحنيكا قوعامى پارتيا باسشىلىق گرۋپپاسىنىڭ مۇشەسى، ورىنباسار ٴتوراعا جاڭ جيڭيىڭ جيلين ولكەلىك عىلىم ـ تەحنيكا قوعامىنىڭ وسى رەتكى عىلىم ـ تەحنيكا ارقىلى شينجياڭعا كومەكتەسۋىنىڭ جالپى احۋالىن تانىستىردى ٴارى اكادەميك، مامانداردىڭ سوزىنە جاۋاپ بەردى.
جاڭ جيڭيىڭ بىلاي دەدى: بۇدان بىلاي جيلين ولكەسى مەن التاي ايماعىنىڭ عىلىم ـ تەحنيكا قوعامى سالاسى توراڭعى رۋحىن ساۋلەلەندىرىپ، اكادەميك، ماماندار مەن كاسىپورىندار اراسىندا قارىم ـ قاتىناس كوپىرىن بەلسەنە سالىپ، التاي ايماعى ٴۇشىن جەرگىلىكتى دارىندىلاردى كۇش سالا باۋلىپ، تاقىرىپتىق زەرتتەۋدى تىزە قوسا ورىستەتىپ، اكادەميك، ماماندار قىزمەت پۋنكتى قۇرىلىسىن بەلسەنە ىلگەرىلەتىپ، عىلمي زەرتتەۋ جەتىستىكتەرىنىڭ التاي ايماعىندا كادەگە جاراتىلۋىن جانە قولدانىلۋىن جەبەيدى ٴارى ٴونىمدى قارىم - قاتىناس جاساۋ، بايلانىستىرۋ مەحانيزمىن ورناتىپ، عىلىم ـ تەحنيكا ارقىلى شينجياڭعا كومەكتەسۋدىڭ ناقتى ونىمدىلىگى شينجياڭعا باعىتتامالى كومەكتەسۋ قىزمەتىنىڭ تەرەڭدەي تۇسۋىنە دەم بەرىپ، التاي ايماعىنىڭ جوعارى ساپالى دامۋىنا مىعىم عىلىم ـ تەحنيكالىق تىرەك ازىرلەيدى.
اكادەميك، ماماندار بىلاي دەدى: التاي ايماعىنىڭ اۋىل شارۋاشىلىعىنداعى ەرەكشەلىگى ايقىن، كەن بايلىعىنىڭ قورى مول، مادەنيەت ـ ساياحات جاعىنداعى بولاشاعى نۇرلى ەكەن، ٴار سالادان قارىشتاپ كوركەيۋ جاعدايىن بايقاۋعا بولادى. ٴبىز ٴوز ابزالدىلىعىمىزدى تولىق ساۋلەلەندىرىپ، التاي ايماعىنداعى قاتىستى تاراۋمەن، ورىنمەن جانە كاسىپورىنمەن تىعىز ۇشتاسىپ، جەرگىلىكتى ورىننىڭ اۋىل شارۋاشىلىعىن وسىزامانداندىرۋ، كەن بايلىعىن اشۋ، مادەنيەت پەن ساياحاتتى توعىستىرۋ، ۇلتتىق ەمشىلىك پەن دارىگەرلىكتى جالعاستىرۋ جانە وندا جاڭالىق اشۋ، جاڭا ەنەرگيا جانە ينفورماتسيا تەحنيكاسىن دامىتۋ، سونداي - اق عىلىم جالپىلاستىرۋ قىزمەتى قاتارلى جاقتىڭ قازىرگى جاعدايى مەن سۇرانىسىن تەكسەرىپ ـ زەرتتەپ، تەحنيكالىق جەتەكشىلىك ەتۋ، دارىندىلاردى باۋلۋ، نىسان سەلبەستىگى قاتارلى كوپ ٴتۇرلى فورما ارقىلى التاي ايماعىنىڭ ٴار سالاداعى عىلىم ـ تەحنيكادا جاڭالىق اشۋدا قامال الۋىنا دەم بەرىپ، جەرگىلىكتى ورىننىڭ ەكونوميكاسى مەن قوعامىنىڭ دامۋىنا قۋاتتى عىلىم ـ تەحنيكالىق قوزعاۋشى كۇش ۇستەيمىز. سونىمەن بىرگە، التاي ايماعىمەن ۇزاق ۋاقىت، ورنىقتى سەلبەستىك قاتىناسىن ورناتىپ، عىلىم ـ تەحنيكا ارقىلى شينجياڭعا كومەكتەسۋ قىزمەتىندە سۇبەلى تابىسقا قول جەتكىزۋگە بىرگە كۋا بولىپ، التاي ايماعىنىڭ جاڭا داۋىردەگى جوعارى ساپالى دامۋ جولىندا نىق قاداممەن العا تارتۋىن تىزە قوسا ىلگەرىلەتەمىز.
جەڭىس قادىس ۇلى جيلين ولكەلىك عىلىم ـ تەحنيكا قوعامى مەن اكادەميك، مامانداردىڭ تالاي جىلدان بەرى، التاي ايماعىنا كوڭىل ٴبولىپ قولداعاندىعىنا التاي ايماقتىق پارتكوم مەن اكىمشىلىك مەكەمەسى اتىنان شىن جۇرەكتەن العىس ايتتى. جەڭىس قادىس ۇلى بىلاي دەدى: قازىر التاي ايماعى دامۋ تاسىلىنە بۇرىلىس جاساۋدىڭ، ەكونوميكالىق قۇرىلىمدى رەتتەۋدىڭ، ارتۋ قوزعاۋشى كۇشىن اۋىستىرۋدىڭ شەشۋشى كەزەڭىندە تۇر، عىلىم ـ تەحنيكادا جاڭالىق اشۋعا قوزعاۋشى كۇش قوسۋ، جەتەكشىلىك ەتۋ ايرىقشا ماڭىزدى. اكادەميك، ماماندار التاي ايماعىنىڭ ناقتى احۋالىنا قاراتا بولجامدىلىققا جانە مەڭگەرىمدىلىككە يە كوپتەگەن قۇندى ۇسىنىس بەرىپ، تىڭ تىنىس بايقاتىپ، التاي ايماعىنىڭ جوعارى ساپالى دامۋىنا، عىلىم ـ تەحنيكادا جاڭالىق اشۋىنا تۇساۋ بولاتىن كورنەكتى ماسەلەنى شەشۋى ٴۇشىن جاڭا وي جەلىسىن ازىرلەدى. جيلين ولكەلىك عىلىم ـ تەحنيكا قوعامى مەن اكادەميك، مامانداردىڭ التاي ايماعىنىڭ عىلىم ـ تەحنيكا قىزمەتىنە اۋەلگىسىنشە كوڭىل ٴبولىپ، قولداپ، عىلىم ـ تەحنيكا ارقىلى شينجياڭعا كومەكتەسۋ قىزمەتىندەگى ناقتى ناتيجەمەن شينجياڭعا باعىتتامالى كومەكتەسۋ قىزمەتىنىڭ تەرەڭدەۋىن، ناقتىلانۋىن ىلگەرىلەتۋىن ٴۇمىت ەتەمىز.
ماجىلىسكە ايماقتىق اكىمشىلىك مەكەمەسىنىڭ قاتىستى باسشىلارى جانە قاتىستى تاراۋلار مەن ورىندارداعى نەگىزگى جاۋاپتى جولداستار قاتىناستى.
放大
