دالمە - ءدال تىڭايتقىش بەرۋ + اۋىل شارۋاشىلىق ماتەريالدارىن ءتۇيىلىستىرۋ ارقىلى اۋىل شارۋاشىلىعىنىڭ ونىمدىلىگىن ارتتىرۋعا دەم بەردى

　　گازەتىمىزدىڭ حابارى (پراكتيكانت ءتىلشى ۋاڭ جيڭحۇڭ، ۇسىنىس ەتىلگەن ءتىلشى ليۋ جينرۇي حابارلايدى). مەملەكەتتى قۇدىرەتتەندىرۋدە، ءسوز جوق، الدىمەن اۋىل شارۋاشىلىعىن كۇشەيتۋ كەرەك، اۋىل شارۋاشىلىعىن كۇشەيتكەندە عانا مەملەكەتتى قۇدىرەتتەندىرۋگە بولادى. پارتيا 20 - كەزەكتى ورتالىق كوميتەتى ءتورتىنشى جالپى ءماجىلىسى “اۋىل شارۋاشىلىعىن، اۋىل - قىستاقتى وسىزامانداندىرۋدى جەدەلدەتىپ، اۋىل - قىستاقتى جاپپاي گۇلدەندىرۋدى تىڭعىلىقتى ىلگەرىلەتۋ” جونىندە جاڭا ورنالاستىرۋ جاساپ، “‘اۋىل شارۋاشىلىعى، اۋىل - قىستاق، شارۋالار’ ماسەلەسىن ويداعىداي شەشۋدى بۇكىل پارتيا قىزمەتىندەگى ەڭ ماڭىزدى ورىنعا قويۋعا تاباندى بولىپ، قالا مەن اۋىلدىڭ توعىسپالى دامۋىن جەبەپ، كەدەيلىكتەن ارىلتۋدان قامال الۋدىڭ جەتىستىكتەرىن ۇزدىكسىز بەكەمدەپ، كەڭەيتىپ، اۋىل - قىستاقتىڭ وسىزامانعى تۇرمىس شارت - جاعدايىن نەگىزىنەن ازىرلەۋىن ىلگەرىلەتىپ، اۋىل شارۋاشىلىعىندا قۇدىرەتتى ەل قۇرۋدى جەدەلدەتۋدى” ايقىن العا قويدى.

　　2024 - جىلى التاي ايماعىنىڭ استىق ەگىلگەن جەر اۋدانى ءبىر ميلليون 930 مىڭ مۋ بولىپ، ءونىم مولشەرى ءبىر ميلليون تونناعا جەتىپ، ارتۋ مولشەرى مەن ارتۋ قارقىنى بۇكىل شينجياڭ بويىنشا الدىڭعى ورىندى يەلەدى. مال شارۋاشىلىعى كاسىبىنىڭ دارەجەسى ورنىقتى جوعارىلاپ، التاي قويى مەملەكەتتىڭ جاعراپيالىق بەلگى ءونىمى بولىپ بەكىتىلدى، شىڭگىل ءتۇبىتتى ەشكىسى مەملەكەتتىڭ مال، ءۇي قۇستارىنىڭ گەنەتيكالىق بايلىعىنىڭ جاڭا سورتى دەپ تۇراقتاندىرىلدى. جەمىس ورمانى ەگىلگەن جەر اۋدانى 300 مىڭ مۋدان، جۇڭگوشا دارىلىك ءشوپ ەگىلگەن جەر اۋدانى 100 مىڭ مۋدان استى، جەمەنەي ەرتىس قىسقىش شايانىن “سولتۇستىكتە كوبەيتىپ، وڭتۇستىكتە جەتىلدىرۋ” تەحنيكاسى وڭتۇستىك پەن سولتۇستىكتىڭ باعىمشىلىق تىزبەگىن تۇتاستىرىپ، بۇكىل ەلدى شاباق تۇقىمىمەن قامدادى.

　　اۋىل شارۋاشىلىعى گۇلدەنسە، بارلىق كاسىپ گۇلدەنەدى، شارۋالار اۋقاتتانسا، مەملەكەت قۇدىرەتتەنەدى. جاقىنعى كۇننەن بەرى، ايماقتاعى ءار دارەجەلى اۋىل شارۋاشىلىعى، اۋىل ـ قىستاق تاراۋلارى كاسىپ سالاسىنىڭ ەرەكشەلىگىن توڭىرەكتەپ، ناقتى شارا قولدانىپ، “اۋىل شارۋاشىلىعىنا، اۋىل ـ قىستاققا، شارۋالارعا” دالمە - ءدال قىزمەت وتەدى.

　　بيىل 11 - ايدىڭ 9 - كۇنى شىڭگىل اۋداندىق اۋىل شارۋاشىلىعى، اۋىل ـ قىستاق مەكەمەسى حيميالىق تىڭايتقىشتى پايدالانۋ تەحنيكاسى جونىندەگى اۋىس ـ كۇيىس جاساۋ اڭگىمە ءماجىلىسىن جانە قامداۋ مەن قاجەتسىنۋدى ءتۇيىلىستىرۋ قيمىلىن دەن قويا ۇيىمداستىردى. قيمىلدا نازاردى “عىلمي جولمەن تىڭايتقىش بەرۋ، ساپانى جوعارىلاتىپ، ونىمدىلىكتى ارتتىرۋ” وزەگىنە شوعىرلاندىرىپ، كاسىپتىك مامانداردى، حيميالىق تىڭايتقىش كاسىپورىندارى مەن جەرگىلىكتى ورىنداعى ەگىنشىلىك وتباسىلارىن ءبىر اراعا باس قوسۋعا ۇسىنىس ەتىپ، تەحنيكادان ورتاق يگىلىكتەنۋ، ونىمدەردى تانىستىرۋ، تاجىريبە اۋىستىرۋ قاتارلى فورمالار ارقىلى ۇكىمەت، كاسىپورىن، اۋىل شارۋاشىلىعى سىندى 3 جاقتىڭ جوعارى ونىمدىلىكپەن ءتۇيىلىسۋ كوپىرىن سالىپ، شىڭگىل اۋدانىنىڭ اۋىل شارۋاشىلىعىنىڭ جوعارى ساپالى دامۋىنا، اۋىل ـ قىستاقتىڭ جاپپاي گۇلدەنۋىنە تىڭ ومىرشەڭدىك كۇش قوستى.

　　قيمىلدا شىڭگىل اۋداندىق اۋىل شارۋاشىلىعى، اۋىل - قىستاق مەكەمەسى ۇسىنىس ەتكەن اگرونومدار “توپىراق قۇرامىن ولشەپ، تىڭايتقىش بەرۋ تەحنيكاسىنىڭ ماڭىزدى تۇيىندەرى”، “تۇرلىشە داقىلدارعا قاجەتتى تىڭايتقىش بەرۋ قاعيداسى جانە دالمە - ءدال پايدالانۋ جوباسى”، “قورشاعان ورتانى قورعايتىن جاڭاشا تىڭايتقىشتىڭ قولدانىلۋ بولاشاعى” قاتارلى وزەكتى مازمۇندار توڭىرەگىندە ارناۋلى تاقىرىپتا ساباق ءوتتى. ماماندار شىڭگىل اۋدانىنىڭ توپىراق ساپاسىنا، كليمات شارت - جاعدايىنا جانە نەگىزگى ەگىلەتىن داقىل تۇرلەرىنە ۇشتاستىرىپ، ساندى مالىمەتتەردى سالىستىرۋ،  مىسالدارعا تالداۋ جاساۋ قاتارلى تاسىلدەر ارقىلى قالىپتان تىس تىڭايتقىش بەرۋدىڭ ەكولوگيالىق ورتاعا جەتكىزەتىن زيانىن، دالمە - ءدال تىڭايتقىش بەرۋدىڭ عىلمي ەسەپتەۋ ءادىسىن، سونداي - اق حيميالىق تىڭايتقىشتىڭ ورنىنا ورگانيكالىق تىڭايتقىش بەرۋدىڭ شەشۋشى تەحنيكاسىن ەگجەي ـ تەگجەيلى ءتۇسىندىرىپ، ەگىنشىلىك وتباسىلارىن “قاجەتكە قاراي تىڭايتقىش بەرۋ، توپىراققا قاراي تىڭايتقىش بەرۋ” سىندى جاسىل ءوندىرىس ۇستانىمىن بەرىك ورناتۋعا جەتەلەپ،“حيميالىق تىڭايتقىشتىڭ مولشەرىن ازايتىپ، ونىمدىلىگىن ارتتىرۋ، اۋىل شارۋاشىلىعىنىڭ جاسىل، تومەن كومىر قىشقىل گازدى بولۋعا بۇرىلىس جاساۋ” نىساناسىن جۇزەگە اسىرۋعا دەم بەردى.

　　اڭگىمە ماجىلىستەن كەيىنگى قامداۋ مەن قاجەتسىنۋدى ءتۇيىلىستىرۋ بۋىنىندا ەگىنشىلىك وتباسىلارى وزدەرىنىڭ ەگىنشىلىك قاجەتىنە ساي حيميالىق تىڭايتقىش كاسىپورىندارىمەن بەتپە ـ بەت كەڭەس وتكىزىپ، سەلبەستىك جاسادى، ءىشىنارا ەگىنشىلىك وتباسىلارى ناق مايداندا كاسىپورىندارمەن ساتىپ الۋ كەلىسىمىنە قول قويىپ، كاسىپورىن تۇراقتى حيميالىق تىڭايتقىش ونىمدەرىمەن جانە تۇتاس بارىستاعى تەحنيكالىق جاقتان قىزمەت وتەۋمەن قامداۋعا كەلىستى. بۇل شارا ساپالى اۋىل شارۋاشىلىق ماتەريالدارىن　　 اۋىل - قىستاققا جەتكىزۋدىڭ “ەڭ سوڭعى ءبىر كيلومەترىن” تۇتاستىرۋمەن بىرگە، كاسىپورىنداردىڭ جەرگىلىكتى بازاردى اشۋىنا تەكشە ازىرلەدى، بۇل پارتيا 20 - كەزەكتى ورتالىق كوميتەتى ءتورتىنشى جالپى ءماجىلىسىنىڭ “اۋىل شارۋاشىلىعىن كۇشەيتۋ، شارۋالارعا تيىمدىلىك جاساۋ، شارۋالاردى اۋقاتتاندىرۋ ساياساتىنىڭ ونىمدىلىگىن جوعارىلاتۋىنىڭ”، “وسىزامانعى اۋىل شارۋاشىلىق تيجارات جۇيەسىن كەمەلدەندىرۋىنىڭ” جاندى امالياتى.

　　بيىل 11 ـ ايدىڭ 13 ـ كۇنى التاي ايماقتىق 1 ـ ەگىس الاڭى شەكتى جاۋاپكەرشىلىك سەرىكتەستىگىنىڭ ءارقايسى ٴوندىرىس رايوندارىنىڭ جاۋاپتىلارى، ەگىنشىلىك وتباسىلارىنىڭ ۋاكىلدەرى جانە قاتىستى قىزمەتكەرلەر ءبىر اراعا باس قوسىپ، اۋىل شارۋاشىلىق ءوندىرىسىنىڭ قازىرگى جاعدايى جونىندە اۋىس ـ كۇيىس جاساۋ جانە جۇگەرىدەن جوعارى ءونىم الۋ تەحنيكاسى جونىندە اڭگىمە ءماجىلىسىن وتكىزدى.

　　جۇگەرىدەن مول ءونىم الۋ تەحنيكاسى جونىندەگى اڭگىمە ماجىلىسىندە استىقتان مول ءونىم العان ەگىنشىلىك وتباسىنىڭ ۋاكىلدەرى تۇقىم تاڭداۋ، ٴجيى ەگۋ، سۋ مەن تىڭايتقىشتى ءبىر تۇلعالاندىرۋ قاتارلى ناقتى تاجىريبەلەردى ورتاقتاستى. كوپشىلىك وزىق ەگىنشىلىك تەحنيكاسىنىڭ تياناقتانۋى مەن جالپىلاستىرىلۋىن ىلگەرىلەتۋدىڭ تەتىگى جوعارى ءونىمدى ەكونوميكالىق ونىمدىلىكتى جۇزەگە اسىرۋدا ەكەنىن اناعۇرلىم تانىپ جەتتى. ءماجىلىس تاعى جەلىدەگى سۇراۋ - جاۋاپ ءتاسىلى ارقىلى ماجىلىسكە قاتىناسۋشىلاردىڭ اۋىل شارۋاشىلىعىنا قوعامدانعان قىزمەت وتەۋ رازىلىق دارەجەسى جانە بولاشاقتاعى ەگىنشىلىك دامۋ بەتالىسى جونىندەگى پىكىرىن الىپ، نەگىزگى ساتىنىڭ ءۇنىن كەڭىنەن قابىلدادى.

　　قازىر التاي ايماقتىق 1 ـ ەگىس الاڭى شەكتى جاۋاپكەرشىلىك سەرىكتەستىگى بايلىق ابزالدىلىعىن تياناق ەتىپ، عىلىم - تەحنيكا تيپىندەگى كاسىپورىن قۇرۋعا كۇش سالىپ، “جەر ساپاسىن جوعارىلاتىپ ونىمدىلىگىن ارتتىرۋ، نىسان قۇرىلىسى، عىلىم - تەحنيكادا جاڭالىق اشۋ، دارىندىلار قوسىنى قۇرىلىسى، ايگىلى ماركا قۇرىلىسى، كاسىپورىن مادەنيەتى قۇرىلىسى، جوعارى ءونىمدى استىق داقىلدارىنان ۇلگى كورسەتۋ بازاسى، ساپالى اۋىل شارۋاشىلىق ونىمدەرىن ءوندىرۋ بازاسى، اۋىل شارۋاشىلىعى جاڭا تەحنيكاسىن جەتىلدىرۋ بازاسى” سىندى دامۋ ستراتەگياسىن ىلگەرىلەتىپ، عىلىم - تەحنيكانى اۋىل شارۋاشىلىعىنىڭ جوعارى ساپالى دامۋىنىڭ ماڭىزدى كەپىلى ەتىپ، كاسىپورىنداردىڭ ونىمدىلىگىن، جۇمىسشى - قىزمەتكەرلەردىڭ كىرىسىن ارتتىرۋىنا دەم بەرۋدە.