گازەتىمىزدىڭ حابارى (ٴتىلشىمىز دۇڭ شىجۇي، پراكتيكانت ٴتىلشى ماحاينا ماگىر قىزى حابارلايدى). 6 -ايدىڭ 28 - كۇنى تۇستەن كەيىن 2025 ـ جىلعى مەملەكەتتىك جاياۋ ٴجۇرىس جينالىسى (شينجياڭ التاي بەكەتى)كورىنىسى كوركەم التاي قالاسىنىڭ موڭكە جايلاۋىندا وتكىزىلىپ، بۇكىل ەلدىڭ جەر ـ جەرىنەن كەلگەن 500 دەن استام جاياۋ ٴجۇرىس اۋەسكەرىن باۋرادى.
بۇل رەتكى قيمىلدى جۇڭگو شىڭعا شىعۋشىلار قوعامىنىڭ جەتەكشىلىگىندە، التاي قالالىق حالىق ۇكىمەتى باس بولىپ، التاي قالالىق مادەنيەت - دەنەتاربيە، راديو - تەلەۆيزيا جانە ساياحات مەكەمەسى ۇستىنە الىپ وتكىزگەن، كاسىپتىك گرۋپپا 17 كيلومەتر جانە بۇقارالىق گرۋپپا 10 كيلومەتر جاياۋ ءجۇرۋ سىندى ەكى گرۋپپا قۇرىلدى. مۇنىڭ ىشىندە كاسىپتىك گرۋپپادا جەكە - جەكە 4.5 كيلومەتر، 8 كيلومەتر، 12 كيلومەتر جەردە 3 قامداۋ ٴتۇيىنىن؛ بۇقارالىق گرۋپپادا جەكە - جەكە 4.5 كيلومەتر، 6.5 كيلومەتر ارالىقتا ەكى قامداۋ ٴتۇيىنىن قۇردى.
قيمىل كۇنى بۇيرىق بەرىلىسىمەن، جەڭىل سپورت كيىمىن كيگەن جاياۋ ٴجۇرىس اۋەسكەرلەرى كوتەرىڭكى رۋحپەن جولعا شىقتى. وسى رەتكى جاياۋ جۇرىستە موڭكە جايلاۋى اينالما جەلىسىن بويلاپ جۇرەدى، جاسىل كىلەم توسەلگەن موڭكە جايلاۋى بەينە سۋرەتتەي كوركەم كورىنىس قالىپتاستىرىپ، جاياۋ جۇرۋشىلەرگە ۇلى تابيعاتتىڭ قۇدىرەتىن سەزىندىردى. بىرنەشە ساعات ٴجۇرۋ ارقىلى جارىسقا قاتىناسقان بارلىق شاباندوزدار جارىستى ٴساتتى تامامداپ، كوپشىلىك ٴبىر جاعىنان شاتتىققا شومىپ، وزدەرىنىڭ جەڭىسىن قۇتتىقتاپ، ەندى ٴبىرجاعىنان جول بويىنداعى كوركەم كورىنىستەردى القادى، جارىسقا قاتىناسۋشىلار التايدا جالعاستى قالىپ، ىشكەرىلەي ساياحاتتاۋدى جوسپارلادى.
جيليندىك ساياحاتشى لي شياۋيۇي بىلاي دەدى: شينجياڭنىڭ جاراتىلىستىق كورىنىسىن ەجەلدەن اڭساپ كەلەمىن، مەملەكەتتىك جاياۋ ٴجۇرىس جينالىسىنىڭ التايدا وتكىزىلەتىنىن ەستىپ، تيتتەي دە ٴارى ـ ٴسارى بولماستان تىزىمدەلدىم. جول بويىنداعى كورىنىستەر مەنى ٴتانتى ەتتى، سونداي ـ اق كوپتەگەن دوستارمەن تانىستىم، بۇل جولعى ساپارىم ەستەن كەتپەيدى.
التاي قالاسىنىڭ تۇرعىنى ان لياۋ بىلاي دەدى: جايشىلىقتا سپورتتى جاقسى كورەمىن، بۇل جولى جاقىن ماڭنان مەملەكەتتىك جاياۋ ٴجۇرىس جينالىسىنا قاتىناستىم، قاتتى اسەرلەندىم! جەر ـ جەردەگى دوستارمەن بىرگە اۋىلىمنىڭ كوركەم كورىنىسىن تاماشالاپ، التايلىقتاردىڭ بەلسەنە العا باسقان جىگەرىن دە ايگىلەدىم!
ۇعىسۋعا قاراعاندا، مەملەكەتتىك جاياۋ ٴجۇرىس جينالىسى جۇڭگو شىڭعا شىعۋشىلار قوعامىنىڭ 2012 ـ جىلدان باستاپ ٴتۇيىندى تۇردە جالپىلاستىرعان مەملەكەتتىك ايگىلى ماركا قيمىلى ەكەن، قازىرگە دەيىن 100 دەن استام جەردە وتكىزىلىپ، بۇكىل ەلدەگى كوپتەگەن رايونداردى قامتىعان. تاياۋ جىلداردان بەرى، التاي ايماعى “دەنەتاربيە + ساياحاتتىڭ” تەرەڭ توعىسۋىن جاپپاي ىلگەرىلەتىپ، تاۋلى ٴوڭىر سپورتى، قار - مۇز سپورتى سياقتى كوپ ٴتۇرلى كاسىپ كۇيىن بەلسەنە كەڭەيتىپ، جارىس ىستەرىنىڭ كاسىپتىك سيپاتى مەن بۇقارالىق سيپاتىن ٴبىرتۇلعالاندىردى، كوپتەگەن سپورت اۋەسكەرى جارىس بارىسىندا وزدەرىنە سايىس جاريالاپ، دالالىق سپورتتىڭ شەكسىز قىزىعىنا باتتى. وسى رەتكى 2025 ـ جىلعى مەملەكەتتىك جاياۋ ٴجۇرىس جينالىسىنىڭ (شينجياڭ التاي بەكەتى) وتكىزىلۋى جاياۋ ٴجۇرىس اۋەسكەرلەرىنە اۋىس ـ كۇيىس جانە كورمە تۇعىرىن ازىرلەپ قانا قويماي، التايدىڭ تانىمالدىلىعى مەن ىقپال كۇشىن ونان ارى جوعارىلاتىپ، جەرگىلىكتى ورىننىڭ دەنەتاربيە ـ ساياحات كاسىبىنىڭ دامۋىن ىلگەرىلەتتى.
التاي قالالىق مادەنيەت ـ دەنەتاربيە، راديو ـ تەلەۆيزيا جانە ساياحات مەكەمەسىنىڭ باستىعى چىڭ يۇنجيڭ بىلاي دەدى: بۇل رەتكى مەملەكەتتىك جاياۋ ٴجۇرىس جينالىسى دەنەتاربيە جارىسى عانا ەمەس، التايدىڭ جاراتىلىستىق كورىنىسىن ايگىلەۋدىڭ جانە دالالىق سپورتتىڭ دامۋىن ىلگەرىلەتۋدىڭ تاماشا ورايى. بۇدان بىلاي جوعارى ساپالى دالالىق سپورت نىسانالى جەرىن كۇش سالا قۇرىپ، ٴتىپتى دە كوپ باي مازمۇندى دەنەتاربيە قيمىلدارىن ۇزدىكسىز وتكىزىپ، ٴتىپتى دە كوپ ساياحاتشىنى وسى جەردىڭ وزگەشە تارتىمدىلىعىن سەزىنۋگە باۋرايمىز.
放大
