گازەتىمىزدىڭ حابارى (تىلشىلەرىمىز ۋاڭ زىيۋان، چاڭ يرۋ، پراكتيكانت تىلشىلەر ۋاڭ جيڭحۇڭ، ياۋ چىن حابارلايدى). “سولتۇستىك شينجياڭداعى ٴوزى اۆتوكولىك جۇرگىزىپ ساياحاتتاۋداعى ەڭ كوركەم تاس جول” اتالعان التاي ــ قوم تاس جولى نەشە 100 شاقىرىمعا سوزىلىپ، جول بويىنداعى “ٴبىر كۇندە ٴتورت ماۋسىمدى تاماشالاۋ، قۇبىلمالى اۋا رايى” سىندى عاجايىپ كورىنىس ٴاربىر ساياحاتشىنى ۇلى تابيعاتتىڭ حيكىمەتتى جاراتىلىسىنا ٴتانتى ەتتى.
سايىن ساحارا، اسقار تاۋ، نۋ ورمان ٴبىر - بىرىمەن قۇپ جاراسىپ، كوركەم سۋرەتتەي كورىنگەندىكتەن، بۇل جەر ٴوزى اۆتوكولىك جۇرگىزىپ ساياحاتتاۋشىلاردىڭ كوزەۋلى جەرىنە اينالدى.
“«التايىم» اتتى تەلەفيلم وسىندا تۇسىرىلگەندىكتەن، وسى جەرگە اڭسارىمىز اۋدى، بۇگىن كەلگەنىمىزگە 2 كۇن بولدى، العاشقى بەكەتىمىز التاي - قوم تاس جولى، كورىنىسى ەرەكشە كوركەم ەكەن”، - دەدى 6 ـ ايدىڭ 26 ـ كۇنى موڭكە كورىنىس تاماشالاۋ تەكشەسىندە شاڭحايلىق ساياحاتشى سۇن مەي.
6 - ايدىڭ 30 - كۇنى التاي ـ- قوم تاس جولىندا تۇتاس بولىكتە قوس باعىتتا اۆتوكولىك قاتىنادى. ساياحاتشىلارعا قولايلىلىق تۋدىرىپ قانا قويماي، جول بويىنداعى بۇقاراعا اۋقاتتانۋدىڭ جاڭا ورايىن دا الا كەلدى. ۇكىمەتتىڭ جەتەكشىلىگىندە ەرەكشە جايمالار ارت - ارتىنان اشىلدى. التاي قالاسىنىڭ تۇرعىنى دۋ يۇڭجياڭ مەن سەرىكتەستەرى ٴداستۇرلى كيىز ۇيلەردى موڭكە كورىنىس تاماشالاۋ تەكشەسىنە كوشىردى، ٴتۇرلى ـ ٴتۇستى ٴدامدى قۇجىرلاردىڭ حوش ٴيىسى اڭقيدى. “سولتۇستىكتەگى سۋرەت كاريدورىنا كەلمەكشى بولساڭىز، ٴسوزسىز، التاي ــ قوم تاس جولىن باسىپ وتەسىز ! كاۋاپ، پالاۋ سياقتى ٴدامدى تاعامداردى دايىنداپ قويدىق، كوپشىلىكتىڭ كوڭىلدى ويناپ قايتۋىن ٴۇمىت ەتەمىز”، - دەدى دۋ يۇڭجياڭ ساياحاتشىلارعا.
التاي قالاسىنان باستالىپ، قوم قىستاعىنان اياقتالاتىن وسى تاس جولدىڭ جالپى ۇزىندىعى 209.45 كيلومەتر (X852 ورتاق جەلى بولىگىن قامتىمايدى)، ايماقتىڭ “مىڭ شاقىرىمدىق ساياحات كاريدورى” ەكولوگيالىق ساياحات جەلىسىنىڭ ماڭىزدى قۇرامداس بولەگى، ول قوم قىستاعى، تورعايتى جايلاۋى، تۇنباداعى بايىرعى ورمان سياقتى كورىنىس رايوندارىن تۇتاستىرادى.
جۇڭشۋتيانچىڭ (بەيجيڭ) حالىقارالىق مادەنيەتتى دامىتۋ شەكتى سەرىكتەستىگىنىڭ جول باستاۋشىسى ۋاڭ شين بىلاي دەدى: ساياحات جەتەكشىسى رەتىندە مەن شينجياڭنىڭ جەر ـ جەرىن ارالاپ شىقتىم، ەڭ ارماندايتىنىم التاي ــ قوم تاس جولى ەدى، اقىرى، كەلدىم، ويلاعانىمنان دا كەرەمەت ەكەن.
التاي ــ قوم تاس جولىنىڭ كورىنىسى كوركەم بولىپ قالماستان، ونىڭ جول بويىنداعى قىزمەت وتەۋ قۇرىلعىلارى دا “قاتىناس پەن ساياحات توعىسۋ” ۇستانىمىن بارىنشا ساۋلەلەندىردى: كوپتەگەن قىزمەت وتەۋ رايوندارى، اۆتوكولىك توقتاتۋ الاڭدارى جانە كورىنىس تاماشالاۋ تەكشەلەرى سالىنىپ، ٴبىر ٴبولىم كورىنىس تاماشالاۋ تەكشەلەرىنە كۇن نۇرىنان، جاۋىن ـ شاشىننان تاسالاناتىن شاتىرشا مەن تۇزدە تۇنەۋ رايونى ورنالاستىرىلعان؛ قىزمەت وتەۋ رايونى “ٴبىر پۋنكتتە ٴبىر ەرەكشەلىك بولۋدى” جوبالاۋ وزەگى ەتىپ، جەرگىلىكتى ورىننىڭ ەكولوگياسى مەن مادەنيەت فاكتورلارىمەن توعىستىرىلعان. مۇنىڭ ىشىندە ەكاشا قىزمەت وتەۋ رايونىنىڭ نەگىزگى تۇلعالىق قۇرىلىسىنا از ۇلتتاردىڭ ٴداستۇرلى بەدەرلى اشەكەيلەۋىن قولدانعان، الداعى جەردە اس ـ سۋ، اۆتوكولىكتەردى تەكسەرىپ جوندەۋ، ساياحات جونىندە كەڭەس بەرۋ سياقتى قىزمەت وتەۋمەن بىرگە، جاڭا ەنەرگيالى زاريادتاۋ باعاناسى، انالار مەن نارەستەلەر بولمەسى سياقتىلاردى ازىرلەپ، كوپ نەگىزدى ساپار قاجەتىن قاناعاتتاندىرادى.
وسى كەزدە التايدىڭ اسپانى اشىق، ٴشوبى شۇيگىن، كورىنىسى كوركەم بولىپ دوس - جاراندارىڭىزدى ەرتىپ ساياحاتتايتىن تاماشا مەزگىل.
放大
