گازەتىمىزدىڭ حابارى (ٴتىلشىمىز گۇزال ابدىرەشيت، پراكتيكانت ٴتىلشى باۋ حۇڭيۇي حابارلايدى). “پەرىشتە ساپارى ــ شينجياڭداعى تۋما جۇرەك اۋرۋى بار بالالاردى سارالاپ تەكسەرۋ ارەكەتىنىڭ” باستالۋ سالتى 4 - ايدىڭ 7 - كۇنى التاي ايماقتىق انا - بالالار دەنساۋلىعىن قورعاۋ شيپاحاناسىندا وتكىزىلدى. جۇڭگو قىزىل كرەست قور قوعامى، زىبو شىبو جوعارى جاڭا تەحنيكا رايونى شيپاحاناسى بىرگە ۇيىمداستىرعان وسى رەتكى قيمىلدىڭ ماقساتى التاي ايماعىنداعى تۋما جۇرەك اۋرۋى بار 15 جاسقا تولماعان بالالاردى جان- جاقتىلى، ەگجەي - تەگجەيلى سارالاپ تەكسەرۋ جانە قۇتقارۋ - كومەكتەسۋگە قىزمەت وتەۋ.
التاي ايماقتىق قىزىل كرەست قوعامى وسى رەتكى سارالاپ تەكسەرۋ قيمىلىنىڭ ٴساتتى جۇرىلۋىنە شىنايى كەپىلدىك ەتۋ ٴۇشىن، العاشقى كەزەڭدە اۋدانداردى، قالانى ٴۇنحات الەۋمەتتىك ٴنومىرى، دوستار شەڭبەرى سياقتى تۇعىرلار ارقىلى كەڭ كولەمدە ۇگىتتەۋگە ۇيىمداستىرىپ، تۇتاس ايماقتاعى تۋما جۇرەك اۋرۋى بار بالالاردى تۇگەل اداقتادى جانە ەستەلىككە الدى. قيمىل وتكىزىلگەن كۇنى ايماقتاعى 6 اۋدان، ٴبىر قالادان كەلگەن تۋما جۇرەك اۋرۋى بار 140 بالا شوعىرلى سارالانىپ تەكسەرىلدى. قيمىل ورنىندا ەمدەۋ قىزمەتكەرلەرى ايرىقشا بايىپتىلىعىن جانە كاسىپتىك رۋحىن ايگىلەپ، ٴاربىر ناۋقاس بالانى ىجداعاتپەن تەكسەردى ٴارى اتا - انالاردىڭ كۇدىكتى سۇراۋىنا بايىپپەن جاۋاپ بەردى.
ۇعىسۋىمىزشا، وسى رەتكى سارالاپ تەكسەرۋدىڭ كولەمى كەڭ بولىپ، كوپ ٴتۇرلى قاۋىمدى قامتىعان. مۇندا، تۋما جۇرەك اۋرۋى بار ەكەندىگى انىقتالعان نەمەسە بار بولۋى مۇمكىن دەلىنگەن 15 جاسقا تولماعان ناۋقاس بالالار، العاشقى كەزەڭدەگى سارالاپ تەكسەرۋگە قاتىناسقانىمەن وپەراتسيا جاساۋ ارقىلى وڭاۋعا كەلمەيتىندىكتەن وپەراتسيا جاساتىپ ەمدەلمەگەن ناۋقاس بالالار، سونداي - اق “پەرىشتە ساپارى” نىسانى بويىنشا قۇتقارۋ - كومەكتەسۋدەن يگىلىكتەنگەن ٴارى قايتا تەكسەرۋگە تۋرا كەلگەن ناۋقاس بالالار قامتىلعان. شارتقا ۇيلەسەتىن ٴارى ەمدەۋ كومەگىنە ٴزارۋ بولعان ناۋقاس بالالاردىڭ وتباسىنداعىلار جەرگىلىكتى قىزىل كرەست قوعامىنىڭ قىزمەتكەرلەرىمەن بايلانىس جاساسا جانە تىزىمگە الىنسا بولعانى وسى رەتكى ۇمىتكە تولى سالاماتتىق ساپارىن باستاۋىنا بولادى.
جۇڭگو قىزىل كرەست قور قوعامىنىڭ سالماقتى ناۋقاستار كومەك نىساندارىنىڭ ٴبىرى سانالاتىن “پەرىشتە ساپارى” اتىنداعى تۋما جۇرەك اۋرۋى بار بالالاردى قۇتقارۋ - كومەكتەسۋ قيمىلىندا ەمدەۋ جاعىندا ناۋقاس بالالاردى جان - جاقتىلى قولداۋعا كۇش شىعارىلىپ كەلگەن. سارالاپ تەكسەرۋدەن كەيىن ەمدەۋگە بولاتىن ناۋقاس بالالار زىبو شىبو جوعارى جاڭا تەحنيكا رايونى شيپاحاناسىنا اپارىلىپ اقىسىز وپەراتسيا جاساتىپ ەمدەلەدى. جۇڭگو قىزىل كرەست قور قوعامى ەمدەۋ قامسىزداندىرۋى بويىنشا ەسەپتەن كوتەرىلگەننەن كەيىنگى ەمدەۋ قاراجاتىن مىندەتىنە الۋدان تىس، ەمدەلۋ بارىسىندا ٴۇي ىشىندەگىلەردەن قاراۋشى بولعان ٴبىر ادامنىڭ بارىپ - كەلۋدەگى قاتىناس قاراجاتىن ۇستىنە الىپ، ناۋقاس بالالاردى تاماشا ەمدەۋ تەحنيكاسىنان، قۇرىلعىلارىنان جانە قىزمەت وتەۋدەن يگىلىكتەندىرەدى.
ۇعىسۋىمىزشا، 2024 - جىلى التاي ايماعىنداعى وپەراتسيا جاساۋعا بولاتىن تۋما جۇرەك اۋرۋى بار 22 ناۋقاس بالا “پەرىشتە ساپارىنىڭ” كومەگىندە شاندۇڭ 1 - مەديتسينا داشۋەسىنە قاراستى سەنترلى شيپاحاناعا اپارىلعاننان كەيىن وپەراتسيا جاساۋ ارقىلى ەمدەۋ ٴساتتى بولىپ، دەنساۋلىعى قالپىنا كەلگەن.
التاي ايماقتىق قىزىل كرەست قوعامى كەڭسەسىنىڭ ورىنباسار مەڭگەرۋشىسى، 3- دارەجەلى مەڭگەرۋشى قىزمەتكەر كاليما كالاميا قىزى بىلاي دەدى: التايدا جۇرگىزىلگەن وسى رەتكى “پەرىشتە ساپارىنا” قوعامنىڭ ٴار سالاسىنداعىلاردىڭ قامقورلىعى مەن ٴۇمىتى جۇكتەلگەن. وسى ارقىلى الەۋمەتتىك يگىلىك كومەگىنىڭ مەيىرگە تولى كۇش - قۋاتىن جالعاستىرۋعا بولادى. الداعى جەردە تۋما جۇرەك اۋرۋى بار مۇنان دا كوپ بالانىڭ سالاماتتىعىن قالپىنا كەلتىرۋدەن ٴۇمىت بار .
放大
