گازەتىمىزدىڭ حابارى (تىلشىلەرىمىز ياڭ ۋيشۋان، ٴالينا ايدىن قىزى حابارلايدى). 3 - ايدىڭ 2 - كۇنى اۆتونوميالى رايوندىق حالىق قۇرىلتايى تۇراقتى كوميتەتىندەگىلەر التايعا كەلىپ، ايماقتىڭ قىسقى ساياحات سالاسىنىڭ ٴوندىرىس حاۋىپسىزدىگى قىزمەتىنىڭ جاعدايى جونىندەگى مالىمەتتى تىڭداۋ اڭگىمە ٴماجىلىسىن اشتى، اۆتونوميالى رايوندىق حالىق قۇرىلتايى تۇراقتى كوميتەتى پارتيا باسشىلىق گرۋپپاسىنىڭ مۇشەسى جاۋ تيانجيە، ايماقتىق اكىمشىلىك مەكەمەسىنىڭ قاتىستى باسشىلارى، ايماقتىق مادەنيەت، دەنە تاربيە، راديو - تەلەۆيزيا جانە ساياحات مەكەمەسى، شۇعىل جاعدايعا توتەپ بەرۋدى باسقارۋ مەكەمەسى، اۋا رايى مەكەمەسى، قوعام حاۋىپسىزدىگى مەكەمەسى، ٴورت ٴسوندىرۋ، ورتتەن ساقتانۋ، قۇتقارۋ ـ كومەكتەسۋ مەكەمەسى، بازاردى باقىلاۋ - باسقارۋ مەكەمەسى قاتارلى قاتىستى تاراۋلاردىڭ (ورىنداردىڭ) جاۋاپتىلارى ماجىلىسكە قاتىناسىپ، التايدىڭ قىسقى ساياحاتىنىڭ ٴوندىرىس حاۋىپسىزدىگى قىزمەتى ٴۇشىن جاعداي باعامداپ، باعدار بەلگىلەدى.
ماجىلىستە ايماقتىق اكىمشىلىك مەكەمەسىنىڭ قىسقى ساياحات ٴوندىرىس حاۋىپسىزدىگى قىزمەتىنىڭ جاعدايى جونىندەگى مالىمەتىن تىڭدادى، ايماققا توتە قاراستى قاتىستى تاراۋلاردىڭ (ورىنداردىڭ)، التاي قالاسىنا قاتىستى تاراۋلاردىڭ (ورىنداردىڭ) جاۋاپتى جولداستارى تولىقتاپ ٴسوز سويلەدى. ماجىلىستە تاياۋ جىلداردان بەرى، التاي ايماعىنىڭ قىسقى ساياحات ٴوندىرىس حاۋىپسىزدىگى قىزمەتىندە قول جەتكىزگەن ناتيجەلەرىن تۇراقتاندىردى.
ماجىلىستە مىنالار اتاپ كورسەتىلدى: تاياۋ جىلداردان بەرى، التاي ايماعى سولتۇستىك ەندىكتەگى 47 گرادۋستىق “ەڭ تاماشا قارلى بەلدەۋگە” ورنالاسۋداي وزگەشە ارتىقشىلىعىن تياناق، “جۇڭگوداعى قارلى مەكەن”، “ادامزاتتىڭ قار شاڭعى مەكەنى” سىندى ەكى ۇلكەن التىن ماڭدايشالىعىن جەتەكشى ەتىپ، “قار - مۇز بايلىعىنىڭ” دامۋداعى “جالىندى قوزعاۋشى قۋاتقا” اينالۋىن ۇزدىكسىز ىلگەرىلەتىپ، قىسقى ساياحاتتىڭ سەكىرمەلى دامۋىن جۇزەگە اسىردى. قىسقى ساياحات قارىشتاپ دامىعان جاعدايدا ٴوندىرىس حاۋىپسىزدىگى كاسىپ سالاسىنىڭ جوعارى ساپالى دامۋىن قامتاماسىزداندىرۋدىڭ وزەكتى ىرگە تاسىنا اينالدى.
ماجىلىستە ماجىلىسكە قاتىناسۋشىلار قىسقى ساياحاتتىڭ ٴوندىرىس حاۋىپسىزدىگى قىزمەتىندە ورىن تەۋىپ وتىرعان ماسەلەلەر مەن ولقىلىقتاردى، حاۋىپ ـ قاتەر، كومەسكى كىناراتتاردى جانە توتەپ بەرۋ شارالارى توڭىرەگىندە تالقى جۇرگىزىپ، پىكىر اۋىستىردى.
ماجىلىستە مىنالار تالاپ ەتىلدى: قىسقى ساياحاتتاعى ٴوندىرىس حاۋىپسىزدىگى جاۋاپكەرشىلىگى بارىنەن ماڭىزدى، قاتىستى تاراۋلار، ورىندار “ەكىنى تۇراقتاندىرۋدى” باتىل قولداپ، “ەكىنى قورعاۋدى” باتىل ورىنداپ، جاڭا داۋىردەگى پارتيانىڭ شينجياڭدى باسقارۋ جالپى جوباسىن تولىق، دالمە - ٴدال، جاپپاي دايەكتىلەندىرۋ تۇرعىسىنان قىسقى ساياحات ٴوندىرىس حاۋىپسىزدىگى قىزمەتىن ويداعىداي ىستەۋدىڭ ماڭىزدى ٴمانىن تەرەڭ تانىپ جانە يگەرىپ، حالىقتى بارىنەن جوعارى قويۋعا، ٴومىردى بارىنەن جوعارى قويۋعا تاباندى بولىپ، دامۋ مەن حاۋىپسىزدىكتى ٴبىر تۇتاس ويداعىداي جوسپارلاپ، ٴوندىرىس حاۋىپسىزدىگىن باسقارۋ قابىلەتىن ۇزدىكسىز جوعارىلاتۋ كەرەك. قىسقى ساياحاتتىڭ ٴوندىرىس حاۋىپسىزدىگى جاۋاپكەرشىلىگىن اناعۇرلىم ناقتىلاندىرىپ، ٴتۇيىندى كاسىپ سالالارىنىڭ حاۋىپسىزدىگىن باقىلاۋ ـ باسقارۋدى كۇشەيتىپ، حاۋىپ ـ قاتەرلەردى، كومەسكى كىناراتتاردى ٴبىر ـ بىرلەپ تەكسەرۋدى، جونگە سالۋدى ۇدايىلاندىرىپ ورىستەتىپ، قالتارىس جەر، ەسكەرۋسىز اۋماق قالدىرماۋ؛ حاۋىپسىزدىك ۇگىت ـ تاربيەسىن كۇشەيتىپ، ساياحاتشىلاردىڭ حاۋىپسىزدىك تانىمى مەن ٴوزىن ـ ٴوزى قۇتقارۋ قابىلەتىن جوعارىلاتىپ، حاۋىپسىزدىك ۇستانىمىن ساياحاتتىق قىزمەت وتەۋدىڭ تۇتاس بارىسىنا ٴسىڭىرۋدى ىلگەرىلەتۋ؛ شۇعىل جاعدايعا توتەپ بەرۋ، ٴبىر جاقتى ەتۋ مەحانيزمىن اقاۋسىزداندىرىپ، شۇعىل جاعدايعا توتەپ بەرۋ دايىندىق جوباسىن كەمەلدەندىرىپ، كوپتەگەن تاراۋدىڭ بىرلەسىپ ارەكەتتەنىپ جاتتىعۋ جۇرگىزۋىن كۇشەيتىپ، ٴوندىرىس حاۋىپسىزدىگىنە ساياتىن ٴتۇرلى زاڭ ـ ساياساتتاردى، ولشەم، تالاپتاردى “ەڭ سوڭعى ٴبىر شاقىرىمعا” دەيىن شىن مانىندە تياناقتاندىرىپ، قىسقى ساياحاتتاعى ٴوندىرىس حاۋىپسىزدىگى قىزمەتىنىڭ ساپاسى مەن ونىمدىلىگىن اناعۇرلىم جوعارىلاتىپ، قىسقى ساياحات كاسىپ سالاسىنىڭ حاۋىپسىز، ٴتارتىپتى ارنادا ۇزدىكسىز قىزۋ ورلەۋگە كوتەرىلۋىن، نىق قاداممەن الىسقا بەت الۋىن ىلگەرىلەتۋ كەرەك.
放大
