گازەتىمىزدىڭ حابارى (ٴتىلشىمىز حۋ جۇنشيۋ حابارلايدى). 5 - ايدىڭ 23 - كۇنى ورتالىق كوميتەت ۇگىت، يدەيا، مادەنيەت قىزمەتى باسشىلىق گرۋپپاسى 7 - كەزەكتى مەملەكەتتىك وركەنيەتتى قالا، وركەنيەتتى قىستاق - قالاشىق، وركەنيەتتى ورىن جانە 3 - كەزەكتى مەملەكەتتىك وركەنيەتتى وتباسى، وركەنيەتتى مەكتەپ قۇرۋ جونىندەگى قاراردى جاريالادى. التاي ايماعىنداعى 14 قىستاق - قالاشىق، مەكەمە - ورىن، مەكتەپ جانە وتباسى اعالاپ العا شىعىپ، التاي ايماعى رۋحاني وركەنيەت قۇرىلىسىنىڭ سۇبەلى تابىسىن ايگىلەدى.
مۇنىڭ ىشىندە بۋىرشىن اۋدانى شۇڭقىر قالاشىعىنىڭ قىزىلقايىڭ قىستاعى، كوكتوعاي اۋدانى قىزىلشىلىك اۋىلىنىڭ ەگىزتوبە قىستاعى، قابا اۋدانى سارتام اۋىلىنىڭ قاراوي قىستاعى جانە شىڭگىل اۋدانى ارال قالاشىعىنىڭ تاراتى قىستاعى 7 - كەزەكتى مەملەكەتتىك وركەنيەتتى قىستاق - قالاشىق بولىپ باعالاندى.
جۇڭگو تەلەگراف جارنا شەكتى سەرىكتەستىگىنىڭ التاي بولىمشە سەرىكتەستىگى، جۇڭحۋا حالىق رەسپۋبليكاسىنىڭ جەمەنەي كەدەنى، مەملەكەتتىك باجى باس مەكەمەسىنىڭ التاي قالالىق باجى مەكەمەسى، جۇڭگو جىلجىمالى حابارلاسۋ توبى شينجياڭ شەكتى سەرىكتەستىگىنىڭ التاي ايماقتىق بولىمشە سەرىكتەستىگى، كوكتوعاي اۋداندىق اۋا رايى مەكەمەسى، التاي قالاسى ازات جولى كوشە ٴىس باسقارماسى جانە شينجياڭ ۋاڭيۋان تۇيە ٴسۇتى شارۋاشىلىعى شەكتى سەرىكتەستىگى 7 - كەزەكتى مەملەكەتتىك وركەنيەتتى ورىن بولىپ باعالاندى.
بۇدان سىرت، التاي ايماقتىق 2 - تولىق ورتا مەكتەپ 3 - كەزەكتى مەملەكەتتىك وركەنيەتتى مەكتەپ، شىڭگىل اۋدانىنان بەگزات تالاپقان ۇلىنىڭ وتباسى مەن قابا اۋدانىنان جارقىن دۇزبەنبەك ۇلىنىڭ وتباسى 3 - كەزەكتى مەملەكەتتىك وركەنيەتتى وتباسى بولىپ باعالانىپ، ايماعىمىزدىڭ وقۋ - اعارتۋ سالاسى جانە وتباسى وركەنيەت قۇرىلىسى جاعىنداعى جەتىستىگىن ايگىلەدى.
جۋىق جىلداردان بەرى التاي ايماعى شي جينپيڭ جاڭا ٴداۋىر جۇڭگوشا سوتسياليزم يدەياسىن ىشكەرىلەي ۇيرەنىپ، دايەكتىلەندىرىپ، سوتسياليستىك وزەكتى قۇن كوزقاراسىن جەتىلدىرۋ، امالياتتا ايگىلەۋ قىزمەتىن تىڭعىلىقتى ىلگەرىلەتتى. وركەنيەتتى جەتىلدىرۋ، وركەنيەتتى امالياتتا ايگىلەۋ، وركەنيەتتى ورىن قۇرۋ سىندى 3 ٴىرى ينجەنەريانى ٴبىرتۇتاس جوسپارلاپ ىلگەرىلەتۋ ارقىلى قالا مەن اۋىلدىڭ رۋحاني وركەنيەت قۇرىلىسىنىڭ توعىسپالى دامۋىن جاسامپازدىقپەن ورىستەتىپ، ايماقتىڭ وركەنيەتتى ورىن قۇرۋ دەڭگەيىن ۇزدىكسىز جوعارىلاتتى. وسى بارىستا تۇرعىنداردىڭ يدەيالىق ساناسى جوعارىلاپ، ٴمورالدىق ساپاسى جاقسارىپ، قالا مەن اۋىلدىڭ بەت - بەينەسى شىت جاڭا تۇسكە ەنىپ، بۇقارانىڭ تابىس سەزىمى، باقىت سەزىمى، حاۋىپسىزدىك سەزىمى ۇزدىكسىز كۇشەيىپ، كورىكتى، جاراسىمدى التاي قۇرۋعا قۇدىرەتتى رۋحاني قوزعاۋشى كۇش قوستى.
وسى رەتكى كوپ ٴتۇرلى داڭقتىڭ قولعا كەلۋى التاي ايماعىنىڭ رۋحاني وركەنيەت قۇرىلىسى قىزمەتىن تولىق تۇراقتاندىرۋ بولىپ تابىلادى. ايماقتىڭ وركەنيەتتى ورىن قۇرۋدى ۇزدىكسىز تەرەڭدەتۋىنە دەم بەرىپ، قوعامنىڭ وركەنيەت دەڭگەيىنىڭ تىڭ ورەگە كوتەرىلۋىن ىلگەرىلەتەدى.
放大
