گازەتىمىزدىڭ حابارى (ءتىلشىمىز گۇلناز، ەرىكتى تىلشىلەر قۋانىش ءناسيحات ۇلى، اقىل قايرات ۇلى حابارلايدى). 5 - ايدىڭ 21 - كۇنى جەمەنەي اۋدانى مادەنيەت، ساياحات كاسىبىنىڭ دامۋىنداعى بەلەستىك ساتتى قارسى الدى ــ جالپى 350 ميلليون يۋان قارجى قوسىلعان حۋاتيڭ · حۋايۋان حالىقارالىق قوناقجايدىڭ مادەنيەت، ساۋدا، ساياحات جالپىلىق نىسانى جۇمىس باستادى. بۇل نىسان “شينجياڭدى مادەنيەتپەن نارلەندىرۋدىڭ”، “ساياحات ارقىلى شينجياڭدى گۇلدەندىرۋدىڭ” جاڭالىق اشۋ امالياتى عانا ەمەس، ونان دا ماڭىزدىسى، جەمەنەي اۋدانىنىڭ “ٴبىر بەلدەۋ، ٴبىر جول” باستاماسىندا مادەنيەت پەن ساياحاتتى توعىستىرا دامىتۋدىڭ نىق قادامىن باسقاندىعىن كورسەتەدى.
بۇل نىساننىڭ يەلەگەن جەر اۋماعى 36 مىڭ 900 شارشى مەتر بولىپ، جۇڭگو ــ قازاقستان شەكارا وتكەلىنىڭ وزەكتى رايونىندا حۋاتيڭ جارنا تىزگىندەۋ توبى شەكتى سەرىكتەستىگى ٴبىرتۇتاس جوسپارلاپ سالعان. نىسان جوباسى حالىقارالىق ايگىلى قوناقجاي، مادەنيەت كورمە ورتالىعى، شەكارا اتتاعان ساۋداعا جالپىلىق قىزمەت وتەۋ رايونى سياقتى كوپ نەگىزدى كاسىپ كۇيىن قامتيدى. مۇنداعى ماقسات جوعارى دەڭگەيلى جاتىن ورىن، ەرەكشە ساۋدا، مادەنيەتتى سەزىنۋ ٴبىرتۇلعالانعان شەكارا بەلگىسىن قالىپتاستىرۋ. بۇل نىسان جەمەنەي اۋدانىنىڭ اۆتونوميالى رايوننىڭ “ساياحات ارقىلى شينجياڭدى گۇلدەندىرۋ” ستراتەگياسىن تياناقتاندىرۋداعى ماڭىزدى شاراسى بولىپ، اۋدان ٴوڭىرىنىڭ ساياحاتتىق قىزمەت وتەۋ قابىلەتىن جوعارىلاتىپ، مادەنيەت، ساياحات كاسىبىنىڭ “حالىقارالانۋعا، سارالانۋعا” قاراي بۇرىلىس جاساۋىن ىلگەرىلەتەدى.
تاياۋ جىلداردان بەرى، جەمەنەي اۋدانى قويتاس مەملەكەتتىك 5A دارەجەلى ساياحات كورىنىس رايونىن قۇرۋ، الەم ۇڭگىرى ەسكى جۇرتى ارحەولوگيالىق باقشاسىن اشۋ سياقتى بايلىقتارعا سۇيەنىپ، “مادەنيەت، ساياحات +” ستراتەگياسىن ۇزدىكسىز تەرەڭدەتىپ، قىزىل شەكارانى كۇزەتۋ مادەنيەتى، ساۋىر حالىقتىق سالت - سانا مادەنيەتى سياقتى ەرەكشە IP دى جەتىلدىردى.
حۋاتيڭ جارنا تىزگىندەۋ توبى شەكتى سەرىكتەستىگىنىڭ اتقارۋشى جوراسى، باس القاسى لاۋ تۇڭسى تىلشىگە بىلاي دەدى: بۇل نىسان جەمەنەي اۋدانىنىڭ وزگەشە جاراتىلىستىق كورىنىسى مەن ۇلتتىق مادەنيەتىن تولىق ۇشتاستىرىپ، شەكارا ەرەكشەلىگىنە يە مادەنيەت ، ساياحات جاڭا تانىسقىسىن قالىپتاستىرادى. سالىنىپ بىتكەننەن كەيىن 300 دەن استام جۇمىس ورنىمەن قامداپ، توڭىرەگىندەگى كاسىپتەرگە 1000 نان استام ادامدى جۇمىسقا ورنالاستىرىپ، مەجەمەن جىلىنا 200 مىڭ ساياحاتشى (رەت) قابىلدايدى.
جەمەنەي اۋداندىق مادەنيەت ـ دەنە تاربيە، راديو ـ تەلەۆيزيا جانە ساياحات مەكەمەسى مادەنيەت، ساياحات كاسىبىن دامىتۋ ورتالىعىنىڭ ورىنباسار مەڭگەرۋشىسى ليۋ شۋرۇڭ تانىستىرىپ بىلاي دەدى: نىسان سالىنىپ بولعاننان كەيىن شەكارا اتتاپ ساياحاتتاۋ، شەكارا تۇرعىندارىنىڭ ٴوزارا بازارشىلاۋ بازارى سياقتى كاسىپ كۇيىنىڭ ىقپالداسىپ دامۋىن جەبەپ، جەمەنەيدىڭ “شەكاراداعى شاعىن قالاشىقتان” “ەسىك اشۋعا” قاراي بۇرىلىس جاساۋىنا دەم بەرەدى. بۇل نىسان جۇڭگو ــ قازاقستان شەكاراسىنىڭ ابزالدىلىعىنا سۇيەنىپ، “مادەنيەت، ساياحات + ساۋدا + شەكارا وتكەلى ەكونوميكاسىنىڭ” جاڭا ۇلگىسىن قالىپتاستىرادى. مۇنىڭ ىشىندە 8000 شارشى مەترلىك مادەنيەتتى سەزىنۋ رايونى قازاق ۇلتىنىڭ بەيزاتتىق مادەني مۇرا ونەرىن كورسەتەدى ٴارى شەكارا اتتاعان مادەنيەت اۋىس ـ كۇيىس قيمىلىن وتكىزەدى. بۇدان سىرت، زەردەلى عىلىم - تەحنيكانى، ماسەلەن، كوپ تىلدەگى AI قوناق بولمەسىن باسقارۋشىسى، 10 سەكۋندتا يندۋكتيۆسىز قوناق بولمەسىنە ورنالاسۋ جۇيەسى، زات تاسيتىن قۇلتەمىر قاتارلىلاردى ەنگىزىپ، قىزمەت وتەۋ ونىمدىلىگىن جوعارىلاتادى؛ حالىقارالىق ٴماجىلىس ورتالىعىندا AI قوسانجار اۋدارما جانە 5G تىكە تاراتۋ جۇيەسى ورناتىلىپ، ەل ارالىق ساۋدا قاجەتىن قاناعاتتاندىرادى.
مادەنيەت، ساۋدا، ساياحات جالپىلىق تۇلعا نىسانىنىڭ جۇمىس باستاۋىنا ىلەسە، جەمەنەي اۋدانى “شەكارالىق مادەنيەت، ساياحات كاريدورى” قۇرىلىسىن قاتار ىلگەرىلەتىپ، 3 جىل ىشىندە شەكارا وتكەلى، قويتاس قاتارلى وزەكتى كورىنىس ٴتۇيىنىن تۇتاستىرىپ، 120 كيلومەترلىك تۇتاس وڭىرلىك ساياحات اينالما جەلىسىن قالىپتاستىرۋدى جوسپارلادى. بۇدان سىرت، جالپى 9 ميلليارد 300 ميلليون يۋان قارجى قوسىلىپ، تازا ەنەرگيا، اۋىل ـ قىستاقتى گۇلدەندىرۋ سياقتى سالالاردى قامتىعان 18 ٴتۇيىندى نىسان جۇمىسىن باستادى.
放大
