شينحۋا اگەنتتىگىنىڭ 1 ـ ايدىڭ 13 ـ كۇنى بەيجيڭنەن بەرگەن حابارى (ٴتىلشى ما جويان). 1 ـ ايدىڭ 13 ـ كۇنى تۇستەن بۇرىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارمەن كەلگەن گرەنادا زۇڭليى ميچەلمەن كەزدەستى.
ميچەل شيزاڭنىڭ ديڭرىسىندا جەر سىلكىنىسى تۋىلعاندىعىنا بايلانىستى جۇڭگو ۇكىمەتىنەن جانە حالقىنان شىنايى حال سۇرايتىندىعىن ٴبىلدىردى. شي جينپيڭ بۇعان العىس ايتىپ بىلاي دەپ اتاپ كورسەتتى: وسى رەتكى جەر سىلكىنىسى جۇڭگونىڭ باتىس وڭتۇستىگىندەگى تەڭىز دەڭگەيىنەن بيىك وڭىردە تۋىلدى، جۇڭگو جاق قىسقا ۋاقىت ىشىندە قۇتقارۋ، كومەكتەسۋدى جانە ۋاقىتشا ورنالاستىرۋدى ورىندادى، سونداي ـ اق قىسقا ۋاقىت ىشىندە قايتا قۇرۋدى ورىستەتتى، جۇڭگو ۇكىمەتىنىڭ جەر سىلكىنىسىنە قارسى اتتانىپ، اپاتتان قۇتقارۋدا جەڭىسكە قول جەتكىزۋگە سەنىمى بار، قابىلەتى دە قاپتال جەتەدى.
شي جينپيڭ بىلاي دەپ اتاپ كورسەتتى: جۋىق جىلداردان بەرى، جۇڭگو مەن گرەنادا قارىم ـ قاتىناسى ورنىقتى دامىدى، ەكى جاق ٴوزارا قۇرمەت ەتىپ، تەڭ تۇرعىدا ٴوزارا مامىلە جاساپ، ساياسي ٴوزارا سەنىمدىلىكتى ۇزدىكسىز بەكەمدەدى، ٴارقايسى سالاداعى ناقتى ىستەر سەلبەستىگىنىڭ جەتىستىگى سۇبەلى بولىپ، حالىقتىڭ دوستىعى كۇن سايىن تەرەڭدەدى. جۇڭگو جاق گرەنادا جاقپەن بىرگە ەكى ەلدىڭ دامۋ ستراتەگيالارىن ٴتۇيىلىستىرۋدى كۇشەيتىپ، جۇڭگو مەن گرەنادا سەلبەستىگىنىڭ اناعۇرلىم كوپ جەتىستىكتەرگە قول جەتكىزۋىن ىلگەرىلەتىپ، ەكى ەل حالقىن ٴتىپتى دە جاقسى باقىتقا كەنەلتۋدى قالايدى.
شي جينپيڭ بىلاي دەپ باسا دارىپتەدى: جۇڭگو مەن گرەنادا قارىم ـ قاتىناسىن قورعاۋ جانە دامىتۋ ــ جۇڭگو مەن گرەنادا ەكى ەلدىڭ جانە ەكى ەل حالقىنىڭ ٴتۇبىرلى مۇددەسىنە ۇيلەسەدى. ەكى جاق ديپلوماتيالىق قارىم ـ قاتىناستى قالپىنا كەلتىرگەن 20 جىلدان بەرى ەكى ەل قارىم ـ قاتىناسىنىڭ دامۋىنداعى ٴساتتى تاجىريبەلەردى قورىتىندىلاپ، جۇڭگو مەن گرەنادا قارىم ـ قاتىناسىنىڭ ۇزاق مەزگىل جوعارى دەڭگەيدە دامۋىنىڭ جاڭا جوباسىن كەسكىندەۋى كەرەك. جۇڭگو جاق گرەنادا جاقتىڭ ٴوز ەلىنىڭ مەملەكەت جاعدايىنا ۇيلەسەتىن دامۋ جولىن دەربەس قاراستىرۋىن قولدايدى، گرەنادا جاقپەن ەل باسقارۋ تاجىريبەلەرى جونىندەگى اۋىس ـ كۇيىستى كۇشەيتىپ، ٴار سالاداعى دوستىق بارىس ـ كەلىستى جيىلەتۋدى قالايدى. جۇڭگونىڭ دامۋى گرەنادانى قامتىعان ٴار ەلگە جاڭا دامۋ ورايىن اكەلەدى، تۇستىك ەلدەر سەلبەستىگى جۇلگەسىندە گرەنادا ەكونوميكاسىنىڭ، قوعامىنىڭ دامۋىنا كومەك كورسەتىپ، جاڭا ەنەرگيا، جاسىل، تومەن كومىر قىشقىل گازدى بولۋ، سيفرلى ەكونوميكا سياقتى سالالاردا ەكى ەل سەلبەستىگىنىڭ جاڭا جارقىن ٴتۇيىنىن تۇلعالاۋدى قالايدى. جۇڭگو جاق گرەنادا جاقتىڭ كليمات وزگەرىسىنە توتەپ بەرۋ جانە اپاتتان ساقتانۋ، اپات شىعىنىن ازايتۋ قابىلەتىن جوعارىلاتۋىنا قولداۋ كورسەتەدى، حالىقارالىق قوعامنىڭ شاعىن ارال مەملەكەتتەرىنىڭ كليمات وزگەرىسى ماسەلەسىندەگى ٴجىتى قاداعالاپ وتىرعان ىستەرى مەن تالاپ ـ تىلەكتەرىنە باسا ٴمان بەرۋىن ۇزدىكىسز ىلگەرىلەتۋدى قالايدى. ەكى جاق ادامداردىڭ بارىس ـ كەلىسىن جيىلەتىپ، مادەنيەت، وقۋ ـ اعارتۋ، ساياحات سياقتى سالالارداعى اۋىس ـ كۇيىستى، سەلبەستىكتى كۇشەيتىپ، حالىق تىلەگىنىڭ توعىسۋىن اناعۇرلىم جەبەۋى كەرەك. جۇڭگو جاق تەرەزەسى تەڭ، ٴتارتىپتى دۇنيە ٴجۇزىنىڭ كوپ ۇيەكتەنۋىن، جالپىعا ٴتيىمدى، سيىسىمدى ەكونوميكانىڭ جاھاندانۋىن دارىپتەپ، گرەنادا جاقپەن الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن تياناقتاندىرىپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايدى.
شي جينپيڭ بىلاي دەپ اتاپ كورسەتتى: جۇڭگو جاق كارايب ەلدەرىمەن قارىم ـ قاتىناسقا باستان ـ اياق ايرىقشا ٴمان بەرەدى، وسى وڭىردەگى ەلدەردىڭ ەكونوميكاسىنىڭ، قوعامىنىڭ دامۋىنا ۇزدىكسىز قولىنان كەلگەنىنشە كومەكتەسىپ، ەكى جاقتىڭ جان ـ جاقتى سەلبەستىك سەرىكتەستىك قارىم ـ قاتىناسىن تەرەڭدەتۋدى قالايدى.
ميچەل جۇڭگو جاقتىڭ وتكەن جىلى 7 ـ ايدا گرەنادا سۇراپىل داۋىل اپاتىنا ۇشىراعاندا دەر كەزىندە كومەكتەسكەنىنە العىس ايتتى. ميچەل مىنالاردى ٴبىلدىردى: گرەنادا مەن جۇڭگو قارىم ـ قاتىناسى وتكەن 20 جىلدان بەرى ۇزدىكسىز تەرەڭدەدى. گرەنادا جاق ٴبىر جۇڭگو پرينسيبىنە تاباندىلىقپەن بويسۇنادى، جۇڭگونىڭ يەلىك ۇقىعى مەن تەرريتوريا تۇتاستىعى، ٴسوز جوق، قۇرمەتتەلۋگە ٴتيىس. گرەنادا جاق گرەنادا مەن جۇڭگو قارىم ـ قاتىناسىنان كوپ يگىلىككە كەنەلدى، جۇڭگومەن سەلبەستىكتى ۇزدىكسىز كۇشەيتۋدى ٴۇمىت ەتەدى. جۇڭگو كوممۋنيستىك پارتياسى حالىقتى وزەك ەتكەن دامۋ ۇستانىمىنا تاباندى بولىپ، جۇڭگوعا باسشىلىق ەتىپ ۇلى دامۋ جەتىستىگىنە قول جەتكىزىپ، وركەندەپ كەلە جاتقان ەلدەرگە ۇلگى ورناتتى، گرەنادا جاق جۇڭگودان ەل باسقارۋ تاجىريبەسىن ۇيرەنۋدى قالايدى. جۇڭگو جەر شارىنىڭ وڭتۇستىگىنىڭ جەتەكشىسى، ەجەلدەن بەرى ٴىرى، شاعىن ەلدەردىڭ تۇگەلدەي تەرەزەسى تەڭ دەگەنگە تاباندى بولىپ، ٴار ەلدىڭ يەلىك ۇقىعى مەن تەرريتوريا تۇتاستىعىنا قۇرمەت ەتىپ، حالىقارالىق ىستەردە ٴسوزى مەن ارەكەتى بىردەي بولىپ، بارعان سايىن ماڭىزدى رول اتقارۋدا. گرەنادا جاق تاباندىلىقپەن جۇڭگو جاقپەن بىرگە تۇرىپ، ٴۇش ۇلكەن الەمدىك باستامانى ويداعىداي تياناقتاندىرىپ، دۇنيە ٴجۇزىنىڭ بەيبىتشىلىگى مەن ورنىقتىلىعىن قورعاۋدى قالايدى.
ۋاڭ ي كەزدەسۋگە قاتىناستى.
(«شينجياڭ گازەتىنەن» الىندى)
放大
