گازەتىمىزدىڭ حابارى (پراكتيكانت ٴتىلشى باۋ حۇڭيۇي حابارلايدى). 11 - ايدىڭ 18 - كۇنى “مەنىڭ التايىم” اتىنداعى ماي بوياۋلى سۋرەت كورمەسى ايماقتىق مادەني ەسكەرتكىشتەر جانە مۇراجاي مەكەمەسىندە (مۇراجاي) اشىلدى، جەرگىلىكتى ۇزدىك ماي بوياۋ سۋرەتشىلەرىنىڭ 75 تۋىندىسى كورمەگە قويىلدى.
“تۋىندىلاردىڭ ٴتۇسى اشىق، وبرازى كورنەكتى، ەرەكشە تارتىمدى”. مىنە، بۇل وسى رەتكى سۋرەت كورمەسىنىڭ تاماشالاعاندارعا قالدىرعان تەرەڭ اسەرى. “اشىق پەن سولعىن ٴتۇستى سالىستىرمالى پايدالانىپ التايدىڭ كوركەم تابيعاتىن جاندى بەينەلەپتى”. بۇل كاسىپتىك قايراتكەرلەردىڭ كورمەدەگى تۋىندىلارعا بەرگەن باعاسى.
تانىستىرۋعا قاراعاندا، وسى رەتكى سۋرەت كورمەسىندەگى ٴبىر ٴبولىم تۋىندىلاردا التىن كۇزدىڭ كوركەم كورىنىسىن بەينەلەۋگە التىن سارى ٴتۇس پەن قانىق قىزىل ٴتۇستى قولدانىپ، تابيعات سۋرەتىن جاندى بەينەلەسە؛ كەيبىر تۋىندىلاردا كوك، جاسىل ٴتۇستى قولدانىپ، اسقار تاۋدىڭ ايباتى مەن ۇلىلىعىن بەينەلەگەن. سۋرەتشىلەر سايىن ساحارا، اسقار تاۋ، بيىك شىڭ، ٴمولدىر بۇلاق، تەڭبىل تاۋ جىنىسى بولسىن، ٴبارىن دە شەبەرلىكپەن بەينەلەگەن. ماي بوياۋلى تۋىندىلاردا سۋرەتشىلەردىڭ جان دۇنيەسى تولىق جەتكىزىلىپ، كەيبىرى مويىماس قايسارلىقتى بەينەلەپ، ۇلى تابيعاتتىڭ تاكاپپارلىعى مەن ايبىنىن ايگىلەسە؛ كەيبىرى جىلى مەيىرگە، تەرەڭ سۇيىسپەنشىلىككە تولى بولىپ، ۇلى تابيعاتتىڭ شۋاقتى مەيىرىن جەتكىزدى ... ٴاربىر تۋىندىعا سۋرەتشىنىڭ اتا مەكەنگە دەگەن شەكسىز تەرەڭ سۇيىسپەنشىلىگى، كوركەمونەرگە دەگەن قاجىرلى تالپىنىسى سىڭىرىلگەن.
放大
