گازەتىمىزدىڭ حابارى (ءتىلشىمىز گۇلناز حابارلايدى). 6 ـ ايدىڭ 17 ـ كۇنى ءتىلشىنىڭ ايماقتىق قاتىناس ـ تاسىمال مەكەمەسىنەن ۇعىسۋىنا قاراعاندا، قازىر التاي ــ قوم تاس جولى بويىنداعى قىزمەت وتەۋ قۇرىلعىلارى قۇرىلىسى جەدەل ىلگەرىلەتىلۋدە، تۇتاس جەلىدەگى جول اسىراۋ جۇمىسى اۋماعى، قىزمەت وتەۋ اۋماعى جانە  توقتاتۋ اۋماعى قۇرىلىسى سوڭعى كەزەڭگە وتكەن. التاي قالاسى مەن قوم كورىنىس رايونىن، قاناس كورىنىس رايونىن تۇتاستىراتىن ساياحات جەلىسى رەتىندە التاي ــ قوم تاس جولى سالىنىپ بولعاننان كەيىن وڭىرلىك ”قاتىناس پەن ساياحاتتى توعىستىرۋدىڭ“ دامۋىنا دەم بەرىپ، التاي ايماعىنىڭ ساياحات ەكونوميكاسىنىڭ ومىرشەڭدىك كۇشىن اناعۇرلىم تاسقىنداتادى.

　　التاي قاتىناس قۇرىلىسىنا قارجى قوسۋ، دامىتۋ شەكتى سەرىكتەستىگىنىڭ ساناعىنا قاراعاندا، التاي ــ قوم تاس جولىنىڭ تۇتاس جەلىسىندە جوبالانعان جول اسىراۋ جۇمىسى اۋماعى، قىزمەت وتەۋ اۋماعى جانە اۆتوكولىك توقتاتۋ اۋماعى تۇگەلدەي سالىنىپ بولادى.

　　التاي ــ قوم تاس جولىنىڭ كورىنىسى كوركەم بولۋدان سىرت، ونىڭ قىزمەت وتەۋ رايونىنىڭ يقۋاتتىق جوباسى “قاتىناس پەن ساياحاتتى توعىستىرۋدى” كورنەكتىلەندىردى. التاي ــ قوم تاس جولى بويىنداعى قىزمەت وتەۋ قۇرىلعىلارى “ءبىر پۋنكتتە ءبىر ەرەكشەلىك” بولۋدى وزەكتى ۇستانىم ەتىپ، جەرگىلىكتى ورىننىڭ ەكولوگياسى مەن مادەنيەت فاكتورىن توعىستىردى. ەكاشا قىزمەت وتەۋ رايونىن مىسالعا الساق، ونىڭ نەگىزگى تۇلعالىق قۇرىلىسى قازاق ۇلتىنىڭ ءداستۇرلى ۇلگىسىمەن بەزەندىرىلگەن، الداعى جەردە اس - سۋ، اۆتوكولىكتى تەكسەرىپ رەمونتتاۋ، ساياحاتقا كەڭەس بەرۋ قاتارلى جالپىلىق قىزمەت وتەيدى. سونىمەن بىرگە، قىزمەت وتەۋ اۋماعى جاڭا ەنەرگيالى زاريادتاۋ باعاناسى، انالار مەن نارەستەلەر بولمەسى قاتارلى حالىققا قولايلى قۇرىلعىلاردى ازىرلەپ، ءجۇرىس - ىس قاجەتىن قاناعاتتاندىرادى.

　　ۇعىسۋعا قاراعاندا، التاي ــ قوم تاس جولى مەجەمەن، 7 - ايدىڭ 1 - كۇنى قوس باعىتتا قاتىنايدى ەكەن. نىسان جاپپاي سالىنىپ بولعاننان كەيىن قوم، تورعايتى جايلاۋى، تۇنبا بايىرعى ورمانى قاتارلى كورىنىس رايونىن تۇتاستىرۋمەن بىرگە، جەلى بويىنداعى ەگىن - مال شارۋاشىلىعى ونىمدەرىن ساتۋ مەن حالىقتىق قونالقى ەكونوميكاسىنىڭ دامۋىن جەبەيدى.

　　قازىر قۇرىلىس جۇرگىزۋشى ورىن بايلىق ۇسىنىلىمىن ارتتىرىپ، “اۋماققا ءبولىپ ايقاسپالى جۇمىس ىستەۋ” ارقىلى ونىمدىلىكتى ارتتىرىپ، اشەكەيلەۋ ينجەنەرياسى اترەتىن كوبەيتىپ، قۇرىلىس مىندەتىن ۋاعىندا ورىنداۋعا شىنايى كەپىلدىك ەتەدى.

　　ساناققا قاراعاندا، التاي ــ قوم تاس جولىندا 2024 ـ جىلى سىناق رەتىندە اۆتوكولىك قاتىناعاننان بەرى، جيىنى 14 مىڭ رەتتەن استام اۆتوكولىك قاتىناپ، 45 مىڭ ادام (رەت) ساياحاتشى قابىلداپ، وڭىرلىك ساياحاتتىڭ قىزۋ ورلەۋى كوتەرىلگەن. تۇتاس لەنياداعى قىزمەت وتەۋ قۇرىلعىلارىنىڭ ىسكە قوسىلۋىنا ىلەسە التاي ــ قوم تاس جولى شينجياڭنىڭ ”جىلدام جەتۋ، اسىقپاي ساياحاتتاۋ“ سارا لەنياسىنىڭ جاڭا ۇلگىسىنە اينالىپ، ەكولوگيالىق ساياحات كوزەۋلى جەرىن قۇرۋعا پارمەندى قوزعاۋشى كۇش ۇستەيدى.