گازەتىمىزدىڭ حابارى (ٴتىلشىمىز گۇزال ابدىرەشيت حابارلايدى). تاياۋدا، ادام كۇشى بايلىعى جانە قوعامدىق قامتاماسىزداندىرۋ مينيسترلىگى، مەملەكەتتىك دەنساۋلىق ساقتاۋ ـ سالاماتتىق كوميتەتى، مەملەكەتتىك جۇڭي شيپاگەرلىك - دارىگەرلىك باسقارۋ مەكەمەسى، مەملەكەتتىك اۋرۋدان ساقتانۋ - تىزگىندەۋ مەكەمەسى «مەملەكەتتىك دەنساۋلىق ساقتاۋ ـ سالاماتتىق جۇيەسىندەگى وزات كوللەكتيۆ پەن وزات جەكەنى جانە “بەتيۋن مەدالىنىڭ” يەگەرلەرىن ماداقتاۋ - سيلاۋ جونىندەگى قاۋلىسىن» جاريالادى. التاي ايماقتىق جۇڭي شيپاحاناسى (قازاق ەمشىلىگى شيپاحاناسى) پارتكومىنىڭ مۇشەسى، شيپاحانانىڭ ورىنباسار باستىعى ميحۋا نيعىمەت قىزى “مەملەكەتتىك دەنساۋلىق ساقتاۋ ـ سالاماتتىق جۇيەسىندەگى وزات قىزمەتكەر” اتاعىن الدى.
ميحۋا نيعىمەت قىزى مەديتسينا سالاسىندا كورنەكتى تابىسقا قول جەتكىزىپ، التاي ايماقتىق ماماندار قامباسىنىڭ مۇشەسى بولدى. ول دۇنيە جۇزىلىك جۇڭي شيپاگەرلىگى ـ دارىگەرلىگى عىلمي قوعامى بىرلەستىگىنىڭ قازاق ەمشىلىگى مەن دارىگەرلىگى ارناۋلى كوميتەتىنىڭ 2 - كەزەكتى باستىعى مىندەتىن وتەۋدە؛ مۇنان سىرت، قازاق ەمشىلىگى بويىنشا جوعارى دارەجەلى ارناۋلى كۋرس مەكتەبىنىڭ وقۋ ماتەريالىن قۇراستىرۋ گرۋپپاسىنىڭ مۇشەسى، جۇڭگو ۇلتتىق شيپاگەرلىك ـ دارىگەرلىك عىلمي قوعامى ۇلتتىق شيپاگەرلىك ـ دارىگەرلىك ولشەمىن زەرتتەۋ، جالپىلاستىرۋ بازاسىنىڭ (التاي ايماقتىق قازاق ەمشىلىگى شيپاحاناسى) قىزمەت كوميتەتىنىڭ مۇشەسى جانە قازاق ەمشىلىگى تولىمدىلىعى بويىنشا امالياتتىق شەبەرلىك ەمتيحانىنىڭ مەملەكەت دارەجەلى باس ەمتيحان الۋشىسى بولىپ، قازاق ەمشىلىگى ـ دارىشىلىگى سالاسىندا تەرەڭ ىقپالعا جانە بەدەلگە يە بولعان.
تالاي جىلدان بەرى، ميحۋا نيعىمەت قىزى “جالعاستىرۋدا ەسكىلىككە جابىسىپ الماۋ، جاڭالىق اشۋدا ٴتۇپ توركىننەن قول ۇزبەۋ” ۇستانىمىن باستان - اياق ۇستانىپ، ٴداستۇرلى جۇڭي شيپاگەرلىگىنە جانە قازاق ەمشىلىگى مەن دارىشىلىگىنە كوكىرەك كەرنەگەن قىزۋ ىنتامەن كىرىسىپ، كاسىپتىك ٴبىلىمدى بار ىقىلاسىمەن ۇڭىلە زەرتتەدى. ول كوپتەگەن تانىمال مامانداردان كىشپەيىلدىكپەن ۇيرەنۋ، حالىق اراسىنداعى ەمكوستەردەن ۇعىسۋ ارقىلى قىرۋار دالمە - ٴدال شيپاشاقتار مەن شيپالى ەمدەردى جيناپ رەتتەپ، قازاق ەمشىلىگى مەن دارىشىلىگىن جالعاستىرۋعا مول ماتەريال توپتادى. ول مەملەكەتتىڭ، اۆتونوميالى رايوننىڭ جۇڭي شيپاگەرلىگى، قازاق ەمشىلىگى مەن دارىشىلىگى جونىندەگى كوپتەگەن زەرتتەۋ نىسانىنا دا بەلسەنە ات سالىسىپ، ۇلتتىق ەمشىلىكتى ـ دارىشىلىكتى دامىتۋعا كۇش قوستى.
ميحۋا نيعىمەت قىزى شيپاحانا باسقارۋ جانە ەمدەۋدە جاڭالىق اشۋ بارىسىندا قازاق ەمشىلىگىندەگى ەرەكشەلىككە يە ەمدەۋ ورتالىعىن قۇرۋعا جەتەكشىلىك ەتىپ، ٴداستۇرلى جۇڭي شيپاگەرلىگى مەن قازاق ەمشىلىگىن ۇشتاستىرا ەمدەۋ جوباسىن كادەگە جاراتىپ، رەتتەپ، قازاق ەمشىلىگىندەگى ەرەكشەلىككە يە كوپتەگەن جاڭا تەحنيكانى ٴساتتى دامىتتى. التايداعى ٴۇستىرت، سۋىق وڭىرلەردە ٴجيى ۇشىرايتىن جەل - قۇز جانە بۋىن سىرقىراۋى، رەۆماتيزم، رەۆماتويد سياقتى اۋرۋلارعا مەڭزەس، ٴداستۇرلى ٴدارى بۇلاۋى نەگىزىندە جۇڭي ٴشوپ دارىلەرىن جاعۋ ـ جاپسىرۋ ارقىلى ەمدەۋ ٴادىسىن جاڭالىق اشا دامىتىپ، كورنەكتى كلەنيكالىق ونىمگە قول جەتكىزىپ، ناۋقاستاردىڭ ايرىقشا جاقسى باعاسىنا يە بولدى. شىنايى شيپاگەرلىك ٴبىلىمى مەن العان بەتىنەن قايتپايتىن عىلمي زەرتتەۋ رۋحىنىڭ ارقاسىندا، ميحۋا نيعىمەت قىزى التاي ايماقتىق جۇڭي شيپاحاناسىنىڭ (قازاق ەمشىلىگى شيپاحاناسىنىڭ) ٴپان جەتەكشىسىنە اينالىپ، شيپاحانانىڭ ۇلتتىق ەمشىلىك ـ دارىشىلىك سالاسىندا تىنباي العا ىلگەرىلەۋىنە جەتەكشىلىك ەتتى.
ميحۋا نيعىمەت قىزى كۇندەلىكتى قىزمەتتە تاماشا قىزمەت وتەۋدى ەڭ باستى ولشەم ەتىپ، ناۋقاستارمەن ٴجيى قارىم - قاتىناس جاساپ، ولاردىڭ دەركەزىندە اۋرۋ ازابىنان قۇتىلۋىنا كومەكتەستى. الىستان كەلگەن ناۋقاستارعا ول قاتىستى بولىمدەردى ىرىقتىلىقپەن سايكەستىرىپ بەرۋ ارقىلى ناۋقاستاردىڭ سول كۇنى تەكسەرىلىپ بولۋىنا، دياگنوزىن انىقتاتۋىنا جانە دەركەزىندە ەمدەلۋىنە شىنايى كەپىلدىك ەتتى. 30 نەشە جىلدا ميحۋا نيعىمەت قىزى جۇمىس ورنىنان تاپجىلماي، ەمدەۋ جاعىندا اعاتتىق جىبەرمەي، ٴىس جۇزىندىك ارەكەتى ارقىلى “شيپاگەرلەر ىزگىلىگى” سىندى جاۋاپكەرشىلىك پەن مىندەتىن ايگىلەدى.
“بەرىلگەن سيلىق ــ ناقتى باعا، ونان دا ماڭىزدىسى، ول جاۋاپكەرشىلىك”. داڭققا بولەنگەن ميحۋا نيعىمەت قىزى بىلاي دەدى: ناۋقاستاردى ٴالى دە وزەك ەتىپ، اناعۇرلىم كوكىرەك كەرنەگەن ىنتامدى جانە كاسىپتىك تەحنيكامدى ايگىلەپ، ەمدەۋ جاعىندا ناۋقاستارعا اناعۇرلىم تاماشا قىزمەت وتەيمىن.
放大
